El próximu miércoles 8 de xineru a les 11h, nel Salón de Graos d’Hestoria del Arte y Musicoloxía de la Universidá d’Uviéu (2ª planta del Edificiu Departamental, Campus de Filosofía y Lletres), tendrá llugar la defensa de la tesis doctoral entitulada Acustemoloxía de la nueche en danza: descripción etnográfica y recursividá. Nel actu, de calter públicu, el musicológu y gaiteru Llorián García Flórez optará a la obtención del grau de Doctor pela Universidá d’Uviéu.
Dedicada a estudiar el movimientu de la nueche en danza dende la perspectiva de la escucha, la tesis propón una mirada innovadora a la reactivación del baille tradicional n’Asturies. Destácase la importancia d’una concepción lúdica y participativa del baille nel desenvolvimientu de la escena de la música asturiana de los últimos diez años. Igualmente, la tesis rellaciona’l floriar d’esta concepción participativa de la tradición coles nueves formes d’ocupar la tierra colos qu’emerxen güei en zones temporalmente autónomes de tol mundu. Núcleos d’auto-organización y d’acción directa nos que güei s’esperimenta con una prometedora forma de lligar los asuntos del erotismu col desurdir d’una nueva sensibilidá ecolóxica a escala planetaria.
L’actu de la que será la primer tesis de música escrita n’asturianu arrancará con una primer intervención del candidatu a doctor, siguía de les consideraciones d’un tribunal espertu qu’evaluará la propuesta y a les que García Flórez tendrá de retrucar. Dempués del actu, habrá baille.
Suscríbite a les nuestres novedaes
