LaGuinda ye un proyectu musical fundáu en Francia pola avilesina Ana Pereda (Filanda). El so estilu musical caracterízase por entemecer ritmos del mundu -llatinos, balcánicos, africanos, mediterráneos…- dientro de los que la música asturiana tien un espaciu destacáu. Preba d’esto son los dos temes últimos que publicó’l grupu en plataformes musicales, ‘Pandeiru‘ y ‘Morenina‘. Tres de dar una montonera de conciertos per Francia, esta formación aporta a Asturies esti agostu per primer vez en dos formatos distintos: tríu y sestetu.
Les dos actuaciones qu’anunciaron a traviés de les sos redes sociales col formatu sestetu son el llunes 25 d’agostu nos Almacenes Kuivi d’Uviéu y el martes 26 a les 22h.30 nel Quioscu del Parque del Muelle d’Avilés, dientro de les fiestes de San Agustín. Amás, en formatu tríu van tocar el vienres 22 a les 22.30h na Taberna Narciso de Teberga y domingu 24 en sesión vermú en L’Apiaderu de Nava. Estos dos enfoques distintos d’actuación respuenden al mesmu proyectu, pero con versiones estremaes adaptaes a cada espaciu.
Estes feches súmense a una xira de más de quince conciertos que’l grupu tien dao dende anicios d’añu y, amás, LaGuinda tien la contratación abierta pa poder tocar el sábadu 23 d’agostu y asina completar la xira esos díes que tean per Asturies.
Suscríbite a les nuestres novedaes
