Mondra ye una de les propuestes de la música gallega que más sonadía ta teniendo y mañana, 1 de mayu, a les 21.30h, va actuar en Lata de Zinc (Uviéu). Música, cuerpu y escena dialoguen cola tradición gallega pa resignificala dende’l presente col espectáculu nuevu d’esti artista qu’asoleyó’l pasáu añu el so segundu discu de llarga duración DERONDA. El conciertu de mañana va ser la segunda vegada qu’actúe n’Asturies, tres de facelo’l pasáu añu na Folixa na Primavera de Mieres.
Les músiques de DERONDA van cobrar vida enriba l’escenariu a traviés de les voces, los sintetizadores y el soníu de les percusiones tradicionales, nuna cuidada puesta n’escena y de gran potencial audiovisual. Enriba l’escenariu, Mondra va tar acompañáu por parte de la so banda, formada por Julia Sánchez-Biezma, Artur Puga, Saínza Piñeiro y Xabi Gómez.
La cita, pa la que yá tán les entraes a la venta por un preciu de 15 euros, forma parte de la xira A RONDA que ta llevando a Mondra per delles de les sales con más renome del Estáu; un músicu que yá tien al costazu más d’un centenar de conciertos.
Artista, cantareiro y baillador, Mondra ye ún de los nomes más destacaos de la escena musical gallega d’anguaño. La so música, basada na tradición oral y musical del so país, amuesa una fuerte carga identitaria que pon el focu na esperiencia queer y lo rural. Col so primer álbum, ARDĒN (2023), algamó’l reconocimientu unánime de públicu y crítica, amás d’otros gallardores como’l Premio Martín Códax al Mejor Álbum de Electrónica 2024, o el Premio Mestre Mateo al Mejor Videoclip 2025 por ‘MARIMONDRA’. El músicu ta acabante d’asoleyar el single y videoclip ‘Mazarocas‘ xunto al prestixosu productor d’electrónica de raigañu Baiuca.
Suscríbite a les nuestres novedaes
