Dempués del manifiestu «Música n’asturianu SÍ» y de los artículos d’opinión de Xune Elipe y José Ángel Hevia, siguen llegando respuestes a les declaraciones de la conceyala de Festexos de Vox en Xixón y diputada na Xunta Xeneral, Sara Álvarez Rouco, de nun querer programar música n’asturianu na villa de Xovellanos. La Xunta Directiva de l’Asocación d’Intérpretes de Canción Asturiana (AICA) -entidá con sede en Xixón qu’axunta a una montonera d’intérpretes del ámbitu de la tonada asturiana-, ta acabante d’asoleyar un comunicáu nel qu’afirmen qu’esto ye «un agraviu pa munchos intérpretes» y «representa un dañu intencional y evidente pa manifestaciones folclóriques del nuestru patrimoniu como la tonada, el teatru costumista o’l monólogu asturianu». Por eso pide al «Gobiernu del Conceyu qu’actúe pa evitar el dañu irreparable qu’esta actitú causaría». Amás critiquen la postura «poco exemplar y democrática» d’Álvarez Rouco por querer torgar el «desenvolvimientu d’una cultura popular abierta, rica, variada y plural, dirixida a tolos segmentos y gustos de la población».
Suscríbite a les nuestres novedaes
