La cantante, panderetera, artista visual y doctora n’Historia del Arte Leticia Baselgas va ser la protagonista del episodiu de Xuntanza d’esti domingu 12 d’ochobre. A les 22.30h esti programa de TPA dedicáu a «celebrar la música al traviés de quienes la viven, la reinventen y la tresmiten» va recoyer les actuaciones d’Ún de Grao, Nacasa Trío, Rellume, Soi Panderetera y el Grupu de Baille Tradicional Trebeyu.
Leticia Baselgas lleva dende mui neña venceyada a la música tradicional del país. Bailló n’agrupaciones folclóriques, foi componente de Muyeres, fundó xunto con Rubén Bada’l dúu L-R, col qu»anovaron la tradición a traviés del post-folk-asturianu, toca en Calea y tamién ufrió dos actuaciones con un proyectu en solitario. Tou esti percorríu a traviés de la so rellación cola tradición espeyólu nel llibru Diarios d’una panderetera.
Pal capítulu d’esti domingu en Xuntanza, Baselgas va arrodiase de persones bien cercanes: Raquel y Estefanía de Soi panderetera, un grupu que nació de la Escuela de Música Tradicional La Quintana de Xixón; Henar y Óscar de Trebeyu, encargaos de caltener y difundir la cultura asturiana colla música y el baile; José Martínez Álvarez, ‘Un de Grao’, que mece tonada con soníos de rock, jazz y blues; el grupu de xóvenes pandereteres con repertoriu pal baille Rellume; y por Nacasa Trío, la banda formada por Tania Pereira, Vero Rubio y Rita Ojanguren, que suena col estilu personal de caúna d’elles.
Suscríbite a les nuestres novedaes
