Llanes acueye’l festival Folk, Post-Folk del 3 al 12 de xunu

Del 3 al 12 de xunu Llanes va enllenase de música asturiana. Calea, Paganéu Live, El Velcro, La Maramoniz, Burbús, Orquesta Céltica Asturiana y Felpeyu dan forma al festival Folk, Post-Folk qu’entama Llanes Cultura xunto col Muséu Etnográficu del Oriente d’Asturies y cola financiación d’Asturies Cultura en Rede. La Casa la Cultura y El Casinu de Llanes, el Parque de la playa d’El Sablón el mentáu muséu y la ilesia de Celoriu van ser los escenarios d’esti eventu gratuitu que tamién va acoyer actividaes lliteraries, esposiciones y conferencies.

Los conciertos del festival entamen el viernes 3 a les 19h cola actuación de Calea, tríu nuevu de música tradicional formáu por Silvia Quesada, Leticia Baselgas y Rubén Bada. Na nueche va sonar techno-tonada nel patiu de la Casa la Cultura de Llanes cola actuación de Paganéu Live, proyectu d’Odón d’El Paganéu qu’amesta los estilos electrónicos de los 90, xunto a les sos tonaes qu’interpreta davezu nos otros formatos qu’actúa esti cantador.

Pal sábadu 4 el festival arranca a les 19h na Casa la Cultura cola actuación d’El Velcro, proyectu spoken word electrónicu formáu pol escritor Pablo X. Suárez y el músicu Dudu García. A les 21h nel casinu de la capital llanisca actúen La Maramoniz, la formación nueva de Mapi Quintana que, xunto colos pianistes César Latorre y Sonia Cartón y el percusionista Juanjo Díaz amesten música tradicional asturiana y improvisación jazzística.

Burbús, la Orquesta Céltica Asturiana y Felpeyu zarren el festival la segunda selmana de xunu. Los primeros van presentar el so primer EP el vienres 10 a les 19.30h nel parque de la Playa d’El Sablón, la Orquesta Céltica Asturiana actúen a les 18h na Ilesia de Celoriu y Felpeyu continúen cola presentación del so discu últimu, ‘Cerquina‘, el domingu 12 a les 19.30h nel parque de la playa d’El Sablón. Tolos eventos son gratuitos hasta completar l’aforu

Charres y esposiciones
Amás de la música, Folk, Post-Folk programa charres y esposiciones alrodiu la cultura’l país. El vienres 3 nel Muséu Etnográficu del Oriente d’Asturies Ricardo Villoria va presentar la esposición RCTA (Reinterpretación de la Cultura Tradicional Asturiana) a les 17h y Leticia Baselgas va dar la charra Ente’l punk y les ruxideres. Por último, el sábadu 11 de xunu l’etnomusicólogu y gaiteru de Dixebra, Llorián García, va dar a les 19h en la Casa la Cultura la conferencia La falta de cuchu como “los debates que se dan sobre’l sentíu de la revitalización de les músiques tradicionales seríen meyor movilizalos dende’l tipu de perspectiva que da l’arume d’esti preciáu abonu”.