Llanzamos L’Ensame, la campaña de sofitu de 2022

Otru añu más ponemos en marcha una nueva campaña de sofitu a esti proyectu a traviés de cuotes de socios y socies. Esti 2022 llámase L’Ensame. Dende güei y hasta’l 31 de mayu la xente que quiera pue asociase a musicasturiana.com a preciu rebaxáu. Hai tres cuotes: 15 €, qu’inclúi un 5% de descuentu pa toles compres y participaciones en sorteos; 30 €, qu’inclúi tolo anterior más 2 artículos de regalu ensin gastu d’unvíu; y 60 €, qu’inclúi el 5% de descuentu y les participaciones de sorteos, amás de 4 artículos de regalu y 1 exemplar del Anuariu de la Música Asturiana 2022 ensin gastos d’unvíu. La xente que s’asocie va poder disfrutar de les ventaxes de L’Ensame hasta’l 30 d’abril de 2023.

El presupuestu d’un proyectu profesional y integral como’l de Musicasturiana.com ye eleváu; por eso ye necesario algamar financiación pa caltener el mayor portal dixital especializáu na música n’asturianu y gallego-asturianu. En 2021 foron 89 les persones s’asociaron a esta iniciativa, algamando una cifra de 3.029,58 euros. Esti 2022 l’oxetivu ye xubir a les 150 persones asociaes y algamar más de 5.000 euros qu’ayuden a caltener gastos básicos del proyectu y a fomentar la venta de música.

Precisamente, vender más CDs, vinilos, llibros o artículos de merchandising ye ún de los oxetivos cimeros de L’Ensame. Gracies a la xente que s’asoció en 2021, los artistes y discográfiques del país vendieron 145 referencies más, convirtiéndose esta campaña nuna fonte de financiación afayadiza non namás pa musicasturiana.com, sinón tamién pa tola industria musical n’asturianu que forma parte del catálogu d’esta tienda qu’axunta más de 380 referencies.

Como novedá nesta campaña de socios y socies de 2022, destaca que va haber un sortéu mensual esclusivu a socios y socies. Mesmamente, mañana xueves 12, vamos anunciar el primero. Amás, quien s’asocie cola cuota de 60 € va llevar de regalu 1 exemplar del llibru Ígor Medio. El carbón y l’arena (hasta agotar esistencies). Por último, sorrayar que les cuotes 2 y 3 tán rebaxaes hasta’l 31 de mayu; quien s’asocie dempués d’esa fecha va tener que pagar 40 € y 80 € por eses cuotes qu’hasta esi día cuesten 30 € y 60 €.

El portal de la música n’asturianu

Musicasturiana.com ye’l mayor espaciu dixital dedicáu a la música n’asturianu y gallego-asturianu. Nacimos a finales de 2017 como tienda online y distribuidora dixital y nesti tiempu punximos a disposición de públicu de tolos países del mundu un catálogu formáu más de 380 referencies en formatu físicu y más de 350 llanzamientos en formatu dixital. Gracies a esi trabayu, ficimos que la música del país se sintiera dende más de 100 países, algamara más de 17 millones de reproducciones nes plataformes dixitales y se vendieran más de 2.000 CDs. Amás, en xunu de 2021 reconvertímonos y tamién creamos un mediu de comunicación con actualidá diaria sobre esta escena, damos agospiu al AMCA (Archivu de la Música Contemporánea Asturiana), tenemos una axenda d’eventos y trabayamos n’ampliación de la Guía de la Música Asturiana.

Asóciate a L’Ensame de Musicasturiana.com