Musicasturiana.com pon puestu de venta nel Válgame Fest

Esti sábadu 14 de mayu la llocalidá cabraliega d’Arenas acueye la primer edición de Válgame Fest. Tres de tener que cancelase en 2020 y 2021 por mor del andanciu, Los Gascones, Xuacu Amieva y Dixebra a la fin van poder actuar nesti festival entamáu pola agrupación folclórica Corri-Corri. Musicasturiana.com tamién va participar nel eventu dientro del mercáu asitiáu na carpa los conciertos. Dende les 19h y mentanto duren los conciertos, va tar a la venta tol merchandising oficial de Dixebra amás de delles de les 380 referencies que formen el catálogu d’esta tienda especializada en música n’asturianu y gallego-asturianu.

La primer edición del Válgame Fest arranca a les 11 la mañana cola apertura del Mercáu d’Artesanos que va tar asitáu hasta les 20h na Plaza El Castañéu. La bandina Los Gascones va amenizar el vermú y la tarde del eventu con actuaciones pelos chigres d’Arenas a les 13h y a les 17h; mentes que l’asociación 6 Conceyos va encargase de los xuegos tradicionales a les 17h na mentada Plaza El Castañéu.

A les 19h entamen los conciertos na carpa del Parque Públicu. El míticu gaiteru Xuacu Amieva xunto cola formación Dobra toca a les siete la tarde pa presentar los temes del so discu últimu, Carombu, y de la carrera del gaiteru llaniscu. Per otru llau, a les 23.30h, Dixebra van dar el segundu conciertu de la xira Ente la Niebla, nel que percuerren parte de los cantares que dan forma al so trabayu nuevu y dellos de los himnos que fueron creando a lo llargo los sos 35 años de trayectoria.

Venta de CDs y Merchandising

Musicasturiana.com va acompañar a Dixebra na so xira Ente la niebla xestionando la venta de merchandising y CDs del grupu avilesín. Amás, en dalgunos eventos como esti Válgame Fest, va aprovechar la ocasión pa poner a disposición del públicu parte del so catálogu formáu por más de 380 referencies ente llibros, discos, vinilos… de tolos estilos de la música n’asturianu y gallego-asturianu.

Mercar discos de los grupos qu’actúen