Llevólu’l Sumiciu actúa nel ciclu ‘Bizi ala Iraun’ qu’entama Kutxa Fundazioa en Donostia
«Bizi ala Iraun ye un glayíu a favor de l’autenticidá, de la búsqueda y puesta en valor de la nuestra identidá, que supón un viaxe a los raigaños y a buscar referentes llocales que s’amesten colos soníos d’anguaño». Con estes pallabres preséntase Bizi ala Iraun (vive o sobrevive), el ciclu de conciertos qu’entama Kutxa Fundazioa, entidá venceyada al bancu Kutxabank. Na sala qu’esta fundación tien en Donosti, l’Aretoa Kluba, van actuar el 4 de marzu Llevólu’l Sumiciu.
El dúu d’electrónica de raigañu va representar a Asturies nesti eventu nel que tamién participen formaciones gallegues, andaluces, catalanes y vasques; toes elles uníes por «reinterpretar la música popular en clave contemporánea», como sorrayen dende Kutxa Fundazioa. Esta actuación surdió gracies a la participación de Musicasturiana.com nel BIME PRO 2022 el pasáu mes d’ochobre y, amás de Llevólu’l Sumiciu, tamién va actuar el gallegu crnds nuna nueche enllena d’electrónica y de folk d’estos dos países celtes. La entrada tien un preciu de 8 euros y les actuaciones entamen a les 21h.
Con esti conciertu, Llevólu’l Sumiciu sigue presentando’l so EP últimu Entaína, un discu nel que renueven la música del país fusionándola con ritmos afrollatinos y electrónicos. Amás d’ello, la xente donostiarra va poder ver l’espectáculu en vivo d’esta formación, nel que los audiovisuales xuguen un papel cimeru gracies a les proyecciones d’imáxenes costumistes y del movimientu obreru del sieglu XX.
