Yá ta disponible en plataformes dixitales «Divina«, el nuevu single del dúu de música electrónica Llevólu’l Sumiciu. El tema ta basáu nel cantar del mesmu nome grabáu por Mapi Quintana y Elías García nel so álbum Severina (2014). Según comenta’l grupu, «Divina» «quier tresmitir la intensidá d’un amor de branu, la maxa de la lluna llena a la vera la mar, la señaldá y la soledá d’una muyer que nun aceuta’l papel que-y impón la sociedá y decide siguir el so propiu camín».
Con esti single, Llevólu’l Sumiciu tornen cola so mestura de música tradicional asturiana, electrónica y audiovisuales dempués del so primer EP Entaína (2021) -editáu pol sellu Samain Music- y de la so participación en Semando Son, el compilatoriu de la música moza n’asturianu entamáu por musicasturiana.com. El cantar «Divina» ye l’adelantu del so próximu EP La Llobera; va aportar na seronda y n’él quieren facer un homenaxe a Ana María García, llanisca xuzgada doblemente nel sieglu XVII: pola inquisición y pola sociedá, que nun aceutaba qu’una muyer quixere ser llibre, tamién no tocante a l’amor.
Suscríbite a les nuestres novedaes
