El conceyu de Salas y la ciudá d’Uviéu acueyen esta selmana dellos eventos al rodiu la Edá Media: el mileniu de la construcción del Monasteriu de San Salvador de Corniana y l’orixe del Camín de Santiago. La música asturiana ta presente en dambes programaciones con un taller de baille tradicional, un festival de tonada, los conciertos de la Banda de Gaites de la Villa de Salas, Calea, Xe de Jota y 6 Riales, y la participación de Los Gascones y Héctor Braga.
Salas celebra dende ayer el Festival Cultural I Milenariu de la Fundación del Monasteriu de San Salvador de Corniana. La Banda de Gaites de la Villa de Salas y Paulino Santirso foron los encargaos d’abrir l’eventu con un conciertu y taller de baille ayeri llunes 8 de xunetu. El sábadu 13 de xunetu a les 12h van sonar les voces de tonada de Reyes Menéndez, Manolo Becerrales, Marina Carbajosa y Aquilino Fernández acompañaes pol gaiteru Xaime Menéndez nel conciertu Mil años del Monesteriu. Festival Canción Asturies. Hores dempués, a les 20h, toquen Rubén Bada, Silvia Quesada y Leti Baselgas col so proyeutu de new trad Calea, na mesma Ilesia del Monasteriu de Corniana. La programación completa del festival puede consultase equí.
L’eventu El primer peregrino. Alfonso II vuelve a celebrase n’Uviéu ente’l 11 y el 14 de xunetu. Héctor Braga actúa esti xueves 11 a les 19h nel actu inaugural. La música asturiana protagoniza’l conciertu del vienres 12 na Plaza de la Catedral a les 21:30h cola bandina Xe de Jota. A les 13h del domingu 14, Los Gascones acompañen el pasacais dende la Plaza de la Catedral hasta’l Parque d’Iviernu, onde toquen 6 Riales a les 19h. La guía completa d’actividaes ta disponible equí.
Suscríbite a les nuestres novedaes
