Esti sábadu 13 d’avientu el Real Conservatorio Profesional de Danza Mariemma de Madrid celebra les xornaes d’estudiu Tesis en Danza VI, nes que se presenten les principales tesis dedicaes al baille que se fixeron nel últimu añu tanto nel Estáu español como nel ámbitu internacional, especialmente’l llatinoamericanu. Dientro d’elles Asturies va tener representación cola ponencia del musicólogu y gaiteru Llorián García Flórez al rodiu la so tesis doctoral: Acustemoloxía de la nueche en danza: descripción etnográfica y recursividá.
Ente les organizaciones qu’entamen y sofiten esti eventu tán la Sociedad Española de Musicología, l’Instituto Nacional de las Artes Escénicas y la Música (INAEM), l’Agencia Estatal de Investigación y el Ministerio de Ciencia, Universidades e Innovación.
La tesis de Llorián García ta eedicada a estudiar el movimientu de la nueche en danza dende la perspectiva de la escucha, y propón una mirada innovadora a la reactivación del baille tradicional n’Asturies. Destácase la importancia d’una concepción lúdica y participativa del baille nel desenvolvimientu de la escena de la música asturiana de los últimos diez años. Igualmente, la tesis rellaciona’l floriar d’esta concepción participativa de la tradición coles nueves formes d’ocupar la tierra colos qu’emerxen güei en zones temporalmente autónomes de tol mundu. Núcleos d’auto-organización y d’acción directa nos que güei s’esperimenta con una prometedora forma de lligar los asuntos del erotismu col desurdir d’una nueva sensibilidá ecolóxica a escala planetaria.
Suscríbite a les nuestres novedaes
