Esti fin de selmana pue esfrutase de música y baille asturianu en Cangues d’Onís, Llanes y Bimenes. Amás, Carreño y Llangréu van ser los escenarios de dos actividaes didáutiques sobre dellos aspectos de la nuestra cultura tradicional. Güei vienres 5 entama’l X Maízu Rock n’Intriago -coles actuaciones de rock astur de Dixebra, Skama la Rede, La Tarrancha y Ochobre- y la XXVIII Fiesta de la Oficialidá de Bimenes en Martimporra, que tien programaes les actividaes principales pa mañana, sábadu 6, colos conciertos de 6 Riales y Skama la Rede a les 22h.
Porrúa celebra’l sábadu’l Llaciniegu cola Romería de Llacín. A partir de les 18h va poder sentise a delles bandines como Los Gascones -que zarren l’eventu-, la Banda Gaitas Llacín, l’asturianada d’Héctor Braga y los sones pal baille de los músicos tradicionales qu’acompañen al Grupu Etnográficu l’Oriente na Nueche en Danza, a les 22h.
L’axenda complétenla la exposición Asturies n’otra dómina. La ropa. entamada pol Grupu de Baille Tradicional San Félix de Candás nes Escueles de Perlora, abierta al públicu dende’l vienres a les 19h hasta’l domingu a les 21h, y la charra-taller Les castañueles asturianes impartía por Santi Galguera en Lada (Llangréu) esti domingu 7 a les 16h, organizada pol Coleutivu de Baille y Música Tradicional L’Enguedeyu.
Na semeya, Skama la Rede, que van actuar en Cangues d’Onís y Bimenes
MERCA DISCOS DE ROCK
Suscríbite a les nuestres novedaes
