Anabel Santiago: «Los herederos de la tonada»

La tonada vien siendo históricamente la nuestra seña d’identidá vocal más importante y característica no que cinca al nuestru folclore tradicional. Bregando escontra l’escaezu y la desaparición supo caltenese “sola en metá de la tierra” per décades y, anque esti xéneru nun ye mui vieyu, sí guarda lo esencial d’un pasáu non tán llonxano que nos lleva a llabores agrícoles, ganaderes, del entornu de la minería o de la mar.

D’un tiempu a esta parte, y como datu a tener en cuenta, alrodiu la tonada asturiana ta xenerándose un resurdir de voces moces que vienen pegando fuerte y que tarán nun futuru non mui llonxano destinaes a ser el relevu lóxicu que pidi pasu.

«Anecdóticamente la voz más moza de los concursos nos años 90 yera la de Jorge Tuya que yá rondaba la trentena»

Alcuérdome que nel añu 1995, cuando entamé a presentame a concursos de tonada asturiana con namás 13 años, la novedá yera qu’una rapacina con esa edá animárase a cantar por La Busdonga delantre d’un teatru enllenu de glories de la canción y ente un públicu esixente y famientu de voces nueves. Anecdóticamente la voz más moza de los concursos nos años 90 yera la de Jorge Tuya que yá rondaba la trentena. Esti datu situábanos nun escaparate poco amañosu pa la continuidá del xéneru d’esa época. Sicasí, y gracies a l’ayuda de la modalidá de canción asturiana pa menores de 25 años promovida pol Concurso y Muestra de Folclore Ciudad de Oviedo, entamaron a despuntar con fuercia nuevos intérpretes pa la nuestra tonada, dalgunos d’ellos aportando dende la nuestra vecina Cantabria.

Pero ye col pasu del tiempu y de los cambios tecnolóxicos cuando realmente la tonada xuvenil entama a tener repercusión y efectu na cantidá y calidá de voces moces que surden llueu. 

«La retresmisión de concursos y festivales de canción asturianu y les escueles de tonada asturiana influyen pa que’l porcentaxe d’escolinos y aficionaos espoxigue»

La llegada de la cadena autonómica de televisión (TPA) allá pel añu 2006 y de la retresmisión de concursos y festivales de canción asturiana ponen en marcha la rueda pa facer xirar la captación de xente mozo dispuesta a aventurase a cantar. Si bien ye ciertu que nesta etapa tamién converxen escueles de tonada asturiana a les que les voces nueves van pa formase como la Escuela de Música Tradicional La Quintana de Xixón o la Escuela de Música Tradicional Manolo Quirós d’Uviéu. Toos estos factores influyen pa que’l porcentaxe d’escolinos y aficionaos espoxigue y los concursos esistentes pasen a replantease incluyir la modalidá infantil/xuvenil nes sos respectives ediciones.

Por mor d’esta apuesta acertada per parte de los medios de comunicación y de los concursos, entamen a dase a conocer los talentos xóvenes qu’aporten dende conceyos como Bimenes, Grau, Gozón, Llanes, Xixón, Llangréu… y consolidándose como apuesta segura dientro del cartelu de cantadores de non namás certámenes xuraos sinón tamién de cartelos festivos. 

Anguaño el númberu de voces moces n’activo ronda la trentena, cuntando voces infantiles y xuvelines.

«Valoro muncho la cantidá de voces (sobre manera en femenín) que surden cada añu y que vienen pisando fuerte»

Como profesora del xéneru valoro muncho la cantidá de voces (sobre manera en femenín) que surden cada añu y que vienen pisando fuerte, toes elles con fame de conocimientu y puxu pa potenciar con aires nuevos a la nuestra asturianada. Voces propies como Alicia Villanueva, Elvira Fernández, Lucía Bravo o Lucía Rodríguez, ente otres, tienen yá una estensa collecha de primeros títulos al so costazu. Otros como Néstor Díaz o Enol G. Barja lleven pocos años d’aprendizaxe y yá ponen en pie al públicu.

Tenemos pues nesta cantera nueva de voces la respuesta a la eterna entruga de la continuidá de la nuestra tonada. Esti saltu xeneracional ta permitiendo qu’un xéneru clásicu reconviértase y se tresforme nun soplu d’aire fresco y renovación.

«Pa puxar poles voces que tán surdiendo sería clave consolidar un circuitu de música namás pa xóvenes artistes o les ayudes necesaries pa que nun futuru puedan afitase como músicos y cantadores»

Ye importante puntualizar que munchos de los grupos folk / experimental / new sound que tán surdiendo n’Asturies tienen ente los sos miembros cantantes de tonada como son Algaire, Muyeres, Antón Menchada, Franidón… Esti datu quier decir que la presencia de la tonada y de la cultura oral tradicional non namás marca’l presente/futuru del propiu xéneru sinón tamién l’espectru musical astur en sentíu más ampliu.

Como reflexón final diría que ye momentu de puxar poles voces que tán surdiendo p’asina poder tener un interesante lobby de cantantes que pudieran defender la nuestra identidá vocal nos años vinientes. Les claves pasaríen por consolidar un circuitu de música del Principáu namás pa xóvenes artistes o, nel so defectu, les ayudes necesaries pa que nun futuru pudiesen competir por afitase como músicos y cantadoresensin tener que rotar una y otra vegada pelos mesmos espacios yá conocíos. Madera pa ello, hai de sobra.

1 Comment

  • Esteban
    03/10/2022

    La Tonada asturiana es una de las herencias que nos dejaron nuestros antepasados y gracias a gente como tú y algunos más esto tira para arriba.

Dexa un comentariu

X