El 17 de mayu de 2024 Misiva despidiéronse de los escenarios nun emotivu conciertu na so casa, Grau. Foron 24 cantares y cuasi hora y media de punk-rock n’asturianu que quedaron na alcordanza de les milenta persones ellí presentes y que zarraron una fueya na historia de la música asturiana qu’entamó a escribise en 2009, cuando’l cuartetu moscón entamó’l so camín. Agora la banda zarra dafechu la so andadura asoleyando lo que-yos quedaba pendiente: el videu d’esi conciertu que grabó, editó y realizó Titi Muñoz.
«Los Misiva siempre paguen les deldes y equí lu tenéis: El vídeu del conciertu col que nos despidimos pa siempre de toes vosotres!» anunciaron Misiva nes sos redes sociales, añadiendo un mensaxe d’agradecimientu: «Nunca vamos sacar les palabres xustes p’agradecevos lo que nos fixistis sentir esi día». D’esta manera celebren el sofitu de componentes de bandes que xubieron al escenariu -Desakato, Mala Reputación, Tribute Against the Machine (vaya conciertazu vos marcárais!), Flashback y Me Freetos, The New Ones, Los Ruidos, Miki…-; de tol equipu técnicu y del públicu. «Como vos dicíamos aquel día, foi LA DESPIDIDA SUAÑADA», remata la banda nel comunicáu qu’acompaña’l llanzamientu d’esti videu en YouTube «pa cuando entre la señaldá».
Misiva foi una de les bandes más renomaes de la escena punk-rock d’Asturies. El so estilu taba marcáu por facer un punk-rock rápidu y melódicu, influyíu por nomes de la escena californiana como Bad Religion o Rancid. Misiva dexaron los escenarios va unes selmanes, pero’l so llegáu sigue bien presente. Editaron cinco CDs –Mala Relixón (2023), En Pie de Xera (2017), Invencibles (2015) y Gran Mentira (2013); toos ellos disponibles a preciu rebaxáu en Musicasturiana.com- que dan bona cuenta de la buelga que dexaron na escena.
Suscríbite a les nuestres novedaes
