A principiu de la década del sieglu XXI la escena musical asturiana taba viviendo una auténtica edá d’oru tocántenes a los soníos de calter célticu, yeren abondoses les bandes, los alcuentros, festivales y iniciatives nesti sen. Surdíen propuestes per dayuri qu’acoyíen el celtismu como una ferramienta amañosa pa ellaborar una nueva música del país.
Una d’eses bandes foron los xixoneses La Gueta la Runa, que diben publicar un par de maquetes nos primeros años d’aquella década. Con un mui bon soníu incluyíen en total ocho cortes d’un marcáu ambiente celta, con versiones de pieces tradicionales irlandeses y composiciones propies.
Foron un grupu de vida curtia, como munchos de los surdíos entós, que representen un momentu mui concretu de la música d’espresión asturiana. Rescampla na so propuesta la inclusión d’instrumentos poco avezaos nesti estilu —casu de la viola— y el calter llíricu del aspectu vocal, ufiertando como resultáu una música melódica y ambiental.
Suscríbite a les nuestres novedaes
