El vienres 25 de xunetu a les 23.30h el Parque Les Conserveres va acoyer la doce edición de la Nueche Celta de Candás. Nesta cita actúen la mítica banda Felpeyu, la formación gallega Böj y Matazúa, un grupu nuevu folk que va xubir per primer vez a un escenariu nesti eventu. Componentes de Llan de Cubel, Skama la Rede o Skontra participen nesti proyectu que tien tamién dalgún tema grabáu de forma autoproducida y entá ensin publicar en plataformes.
Matazúa nació de les sesiones selmanales folk qu’entama’l Conceyu Cultural La Rexa en Candás. La formación ye candasina dafechu y los sos componentes tienen oríxenes musicales mui estremaos como’l folk, el ska, el rock progresivu o’l punk. Asina ye como’l septetu ta integráu por Xuan Rodríguez (gaiteru de Llan de Cubel) a la mandolina; Fonsu Zapico (exgaiteru de Skontra) a la flauta travesera de madera y low whistle; Llou Rodríguez (batería de Skama la Rede) al bodhran; Ánxel Secades (guitarrista de Tubular Tribute) a la guitarra acústica; Elisa Zapico (violinista de formación clásica) al vigulín; Milio García (exbaxista en Spinning Plates y Los Ignorantes) al baxu; y Edu Fernández (guitarrista de Skama la Rede) al bouzuki.
L’interés que xenera deprender a tocar técniques y instrumentos musicales distintos a los qu’interpreten davezu ye una de les razones que tán detrás del surdimientu de Matazúa, un grupu que ye instrumental sobre manera y que tien un repertoriu basáu na música tradicional asturiana, anque tamién caleyen per otros estilos. Ente les sos influencies destaquen los asturianos Felpeyu, Llan de Cubel y N’Arba; los irlandeses Michael McGoldrick; los escoceses Shooglenifty o los bretones Kornog.
Anque nun tienen nengún tema publicáu en plataformes musicales, el grupu sí que fizo dalguna grabación autoproducida y una d’elles sí que pue sentise n’Instagram. Trátase de ‘L’horru mio güela’, composición de Xuan Rodríguez pal espectáculu Al rodiu l’horru y que foi’l cantar d’apertura del 46 Día de les Lletres Asturianes. La intención del grupu ye siguir grabando más temes dempués del branu.
Amás del estrenu de Matazúa -que yá tocara en dalguna sesión folk y bares de manera más bien informal-, la XII Nueche Celta de Candás va tar protagonizada pola veterana formación folk asturiana Felpeyu y la banda gallega Böj. L’eventu ye de baldre y ta entamáu pol Conceyu Carreño -que recuperó esti festival l’añu pasáu, dempués de llevar 17 años ensin facese-, en collaboración con Asturies Cultura en Rede. El cartelu ye obra del diseñaodor candasín Alfonso Zapa.
Suscríbite a les nuestres novedaes
