Vuelve la Folixa na Primavera, una de les cites imprescindibles marcaes nel calendariu de toa persona amante de la música y la cultura asturiana. Del 4 al 6 d’abril les cais, parques y requexos de Mieres del Camín van acoyer esti eventu qu’axunta grupos de baille, conciertos, tonada, cantares de chigre, pasucáis, xuegos infantiles, gastronomía y, por supuesto, sidra. Dende l’Ayuntamientu de Mieres aseguren que’l programa «va facese públicu nos próximos díes» y mentanto adelanten el cartelu, obra del artista xixonés Foni Ardao.
«El cartelu espeya lo que pal artista representa la xente del conceyu: la unión del pueblu, siempre col raigañu presente«, comenten dende la conceyalía de Festexos del Conceyu -dirixida agora por Rocío Antela, tamién responsable de Cultura-. D’esta manera, el diseñu recueye elementos como «la primavera, la sidra y el so escanciáu, los pozos mineros, el ríu y dalgunes edificaciones característiques«. Too ello enlleno de color pa festexar una de les primeres folixes del añu nes que la música’l país ye la protagonista.
Suscríbite a les nuestres novedaes
