Tres d’estrenalu va unes selmanes en toles plataformes musicales, yá pue vese en YouTube’l videoclip de ‘Nicotacum’, l’adelantu del cuartu trabayu de Mota Blues nel qu’esta banda provocadora, divertida y orixinal entemez blues, folk y asturianada nun tema que fala del tabacu y de la marihuana. Nél collabora a la voz el cantador Carlos Velasco -ganador del Premiu La Busdonga d’Asturianada na categoría absoluta masculina-; a la gaita Rubén Alba; al tambor y otres percusiones Juanjo Díaz; a les guitarres Nel de Purnea (Vrienden) y a l’armónica Gary Parfitt. El videoclip ta realizáu por Leti Cienfuegos.
Mota Blues escoyó’l 20 d’abril –Día Internacional de la Marihuana– pa estrenar esti videu y dieron razones pa ello: «El cannabis ye una sustancia que sigue xenerando alderique en 2025. Munchos países del mundu opten pola so normalización y llegalización, mentanto qu’otros aférrense al non dafechu. Dende Mota Blues siempre nos presta qu’esti alderique tea presente. Consideramos que, al llegalizar, podemos xenerar riqueza pal país a traviés de los impuestos, crear puestos de trabayu, acabar coles mafies y el narcotráficu… ¡Axallá dalgún día la llexislación d’estes sustancies dependa de la llóxica y non de la moral».
Cola publicación d’esti videoclip la banda sigue dando novedaes al rodiu de Fumetamorfosis, el discu que’l grupu va llanzar pa la primavera y nel que van sonar estilos como’l rock, la ranchera, el rap y la electrónica.
Suscríbite a les nuestres novedaes
