Yá ta en toles plataformes dixitales ‘Nicotacum‘, adelantu del cuartu trabayu de Mota Blues nel qu’esta banda provocadora, divertida y orixinal entemez blues, folk y asturianada nun tema que fala del tabacu y de la marihuana. Nél collabora a la voz el cantador Carlos Velasco -ganador del Premiu La Busdonga d’Asturianada na categoría absoluta masculina-. a la gaita Rubén Alba y al tambor y otres percusiones Juanjo Díaz.
«Nunca se metió nada asemeyáu a l’asturianada nun discu de Mota y como yo toi tocando con Carlinos, comenté-y que nos entone un ‘marihuana’ guapu, guapu«, diz ente rises Chino l’Indio -cabezaleru de Mota Blues- sobre esti cantar que «entama falando del tabacu, pero como les coses tienen que dir siempre a meyor, deriva nel cannabis». Musicalmente ye’l tema más folk que va tener Fumetamorfosis, el discu que’l grupu va llanzar pa la primavera y nel que van sonar estilos como’l rock, la ranchera, el rap y la electrónica.
‘Nicotacum’ ta compuesto y producíu por Chino l’Indio y Nel de Purnea y grabáu nel estudiu d’esti últimu. «El 20 d’abril, día internacional de la planta que se empeñan en prohibir», va salir el videoclip como’l grupu anunció peles redes sociales.
Suscríbite a les nuestres novedaes
