Esti fin de selmana los conceyos de Degaña y Ibias acueyen la primer edición del CachuFest, un festival qu’axunta música, naturaleza, cultura, etnografía y cine. L’aldea de Trabáu va ser l’escenariu principal d’estes xornaes nes que van tocar 6 Riales, Alienda, Ferla Megía, Guieldu, Eva Tejedor & Les Pandereteres y Llevólu’l Sumiciu. D’esta manera l’eventu axunta música tradicional, folk celta, electrónica y pop nun prestosísimu entornu natural, con entrada llibre y zona d’acampada.
El vienres 22 a les 18h arranca l’eventu col Ciclo de Cine Despoblación nel que se van proyectar tres documentales pa llueu dar pasu a los conciertos. Les pandereteres 6 Riales toquen a les 22.30h y el grupu de folk celta Alienda a la medianueche; too ello na carpa principal asitiada na Plaza de Trabáu. Pal sábadu 23 pela mañana hai delles visites guiaes y actividaes gratuites –previa inscripción-, amás a les 12.30h actúa Ferla Megía en sesión vermú, onde’l xoven músicu va interpretar en solitario los sos cantares qu’entemecen pop, canción d’autor, música electrónica y urbana.
La tarde del sábadu aporta enllena d’actividaes con showcooking y degustación, xuegos pa la reciella y l’estrenu del documental Il Mulín, dirixíu pol corverán Alex Galán y que ta dedicáu a la cultura cunqueira. Llueu d’esto xuben al escenariu de la carpa principal les formaciones folk Guieldu a les 22.30h y Eva Tejedor & Les Panderetes a la medianueche. Dende la organización destaquen amás qu’en tolos conciertos va haber barra de bar, «rincón de xantar» y que tres los conciertos «habrá folixa hasta que’l cuerpu aguante».
Llevólu’l Sumiciu n’Ibias
Más visites guiaes y actividaes varies completen les xornaes el domingu 24 y esti día tamién va haber música n’asturianu. El dúu d’electrónica de raigañu Llevólu’l Sumiciu va ufrir a les 13.30h un Live set «nuna antigua casona con corral, horru y cocina antigua», un orixinal escenariu asitiáu nel Corral de Casa Rodolfo en Villardecendias (Ibias). El CachuFest ’23 remata na carpa principal con una parrillada popular qu’inclúi opciones vexetarianes. L’Espaciu Tormaleo, La Guarida del Cunqueiru y Trabáu Ecoturismu organicen esti festival pa tolos públicos nel que tamién va haber acampada y aparcamientu p’autocaravanas.
Suscríbite a les nuestres novedaes
