Joaquín Pixán y Nacho Fonseca yá son Medaya d’Asturies, y per otru llau, Mariluz Cristóbal Caunedo foi nomada fía predilecta d’Asturies ayeri, nel actu d’entrega del Gobiernu d’Asturies, coincidiendo col día de la comunidá autónoma.
Joaquín Pixán, ye tenor, xestor cultural y gran divulgador de la canción asturiana, nacíu en Cangas del Narcea. Lleva más de cincuenta años dedicáu a la música, entamando la so formación na Scala de Milán, baxo la tutela d’Alfredo Kraus, y tien collaborao con artistes y poetes como Ángel González, Antonio Gamoneda. Na so trayectoria, tien grabao en más de 35 discos d’estremaos estilos, dende la canción lírica clásica hasta composiciones anovadores, fusionando poesía ya música. Na so obra, Asturies tuvo siempre un llugar destacáu, defendiendo de manera constante la tradición y el patrimoniu propiu.
Nacho Fonseca ye maestru, especializáu en filoloxía. Fizo un llabor importantísimu pa fomentar la enseñanza de la llingua asturiana al traviés de la música, fundando en 1987 el grupu Xentiquina, nel Colexu Públicu Solvay-Lieres (Siero), qu’agora lleva’l nome d’aquel coru infantil pel que pasaron más de 200 estudiantes y qu’él dirixó. N’un momentu nel que malpenes había materiales pedagóxicos pal aprendizax, Fonseca emplegó cantares populares y composiciones propies pa enseñar al so alumnáu durante 25 años.
Mariluz Cristóbal Caunedo ye una d’eses persones que punxieron voz a Asturies. Natural de Tineo, ye una de les figures más respetaes y perconocíes de la música tradicional, sobremanera nel ámbitu de la asturianada. Tamién participó activamente na recuperación de la misa de gaita, declarada bien d’interés cultural (BIC). Formó amás parte del Colectivu Etnográficu Muyeres, y collaboró na grabación del exitosu discu Tierra de Nadie, del gaiteru José Ángel Hevia.
Suscríbite a les nuestres novedaes
