“Al son de Peñes” ye’l nome del nuevu festival lluanquín que va abordar la música y los bailles tradicionales del conceyu. El próximu 12 de xunetu va desenvolvese la primer edición d’esti certame que tien la intención de caltenese nos años vinientes ya incluso crecer.
De momentu, “Al son de Peñes” va cuntar con un taller de baille tradicional al mediudía y, yá pela tarde, actuaciones de bandes de gaites, que van incluyir pasucais y conciertos. Esti espectáculu va ser la antesala de les fiestes del Carmen, que se van desenvolver hasta’l 18 de xunetu en Lluanco.
La cita va entamar a les 12.00 hores. El grupu de baille tradicional xixonés Trebeyu organiza un taller p’averar los principales pasos de pieces tradicionales asturianes. La cita de la tarde va cuntar cola participación de trés bandes de gaites: la de Cabu Peñes, Conceyu de Llangréu y Camín de Fierro. Caúna de les bandes va facer un pasucais con un itinerariu distintu; una va rematar na plaza de La Ribera, otra nel parque Zapardel y la última na plaza de la Villa, la del Conceyu.
Tres esos pequeños pasucais, cada banda va ufiertar un pequeñu conciertu. El festival va siguir depués con otru gran pasucais. Nesta ocasión, les trés bandes van realizar el mesmu percorríu y van xunir les sos fuerces. Van salir de la ilesia de Santa María de Lluanco, el pasucais va siguir pela cai peatonal, la cai de La Riba, hasta llegar a la Torre del Reló. El fin de fiesta va ser un conciertu con una duración aproximada d’una hora y media.
Suscríbite a les nuestres novedaes
