Aporta un nuevu nome renovador na escena de l’asturianada. Milfueyes ye’l proyectu poéticu-musical de Sandra Álvarez y Noemí González, que yá ufrieron un recital nel II Semando Fest entamáu por musicasturiana.com y Ixuxú Cultura. La so propuesta amiesta tonada, poesía feminista contemporánea y ritmos tradicionales asturianos. Milfueyes ye, como elles dicen, «asturianada de muyeres, poesía feminista y baille». Cunten y canten dende «una mirada sincera de la vida y historia de les muyeres porque lo personal ye político»
Les dos moces xixoneses dan forma y nome a esta propuesta na qu’intenten averar la poesía contemporánea al folclor tradicional asturianu calteníu poles muyeres a lo llargo los sieglos. Por ello, les lletres de Noemí G. céntrense en visibilizar los procesos propios de les muyeres y los sos cuerpos y acompáñense de la sensibilidá na interpretación de Sandra Álvarez, cantadora d’asturianada y tocadora. Garren el so nome de la flor compuesta Achillea millefolium, emplegada medicinalmente p’ameyorar los dolores de regla, favorecer el sangráu y n’etapes d’amenorrea como la menopausia.
La so próxima actuación ye mañana vienres 26 alredor de les 18h en L.luarca, nel festival d’arte na cai Contubernios Líricos. Nella van poder sentise, amás de los poemes y cantares del so conciertu nel II Semando Fest, material nuevu desendolcáu a partir del poemariu que ta acabante d’asoleyar Noemí G., Las naranjas del abuelo. Ficieron recientemente una entrevista pal podcast Fueguitos en la Caverna, que va tar disponible próximamente na páxina web del mediu arxentín Radio La Retaguardia y na que va poder esfrutase de la so interpretación de dellos cantares. Milfueyes ye, a la fin, una propuesta renovadora enllena de fuercia, remangu, sensibilidá y feminismu fecha por dos muyeres con muncho por cuntar.
MIRA’L VIDEU RESUME DEL II SEMANDO FEST
MERCA DISCOS D’ASTURIANADA
Suscríbite a les nuestres novedaes
