Siguimos aumentando’l catálogu de musicasturiana.com. Yá ta a la venta’l llibru La ornamentación na gaita asturiana, una obra del director de la Banda de Gaites Camín de Fierro y profesor na Escuela de Música y Danza Tradicional «Manolo Quirós» d’Uviéu Balbino Menéndez Suárez (Santu Adrianu, 1977). Esti volume lu asoleyó en 2010 Publicaciones Ámbitu y foi’l primer estudiu monográficu asturianu sobre esti aspeutu de la interpretación de la gaita.
Dende una perspectiva didáutica, el gaiteru apurre un tratáu nel que clasifica y describe les principales formes d’ornamentación nel instrumentu, una propuesta pedagóxica secuenciada pa la so aplicación al enseñu de los adornos, y un capítulu final con reseñes del estilu de dellos gaiteros referentes n’Asturies como Flavio Rodríguez, José Manuel Tejedor, Xuacu Amieva y El Pravianu, ente otros. D’esta manera, Balbino Menéndez, anque nun pretende estandarizar la interpretación de los adornos, sí quier posibilitar un deprendimientu significativu y autónomu, lloñe de la imitación.
MERCA’L LLIBRU DE BALBINO MENÉNDEZ
Suscríbite a les nuestres novedaes
