El Ministeriu de Cultura presentó el pasáu mes de marzu la nueva Oficina d’Esportación de la Música Española, una iniciativa impulsada pola Federación de la Música de España que busca dar un impulsu decisivu a la proyección internacional de los artistes y profesionales del sector. La oficina, baxo’l nome “Music by Spain”, naz col oxetivu de coordinar esfuercios, optimizar recursos y dar mayor visibilidá a la música fecha nel Estáu.
Ente les principales midíes que se van desenvolver tán la participación en feries internacionales, la organización de misiones comerciales y la creación de ferramientes pa facilitar la internacionalización del sector musical. L’oxetivu final ye que la música española tenga una presencia más fuerte, continua y visible nel mercáu global. La so páxina web yá ta disponible y nella puede consultase la xera que va desenvolvese dende esta oficina, asina como consultar convocatories o recursos, ente otres posibilidaes.
Dende Asturies, esti tipu d’iniciatives pueden suponer una oportunidá mui importante. La música asturiana, tanto la tradicional como la más moderna, lleva años buscando mayor proyección fuera del territoriu. Grupos y artistes que mesturen folk, rock o música electrónica con raigañu, mesmo que los d’otros estilos como’l rap o hardcore podríen beneficiase d’esta oficina pa dar el saltu internacional.
Amás, la bayura cultural d’Asturies, con estilos propios, convierte la so música nun productu únicu que podría despertar interés en otros países. Iniciatives como “Music by Spain” podríen ayudar a que la música asturiana gane presencia en circuitos internacionales y festivales, reforzando asina la so identidá y el so futuru.
Suscríbite a les nuestres novedaes
