«Tamos hasta la polla. La nuestra xeneración vemos como tovía tamos ataos por un sentimientu d’estancamientu, por mor de la situación post industrial asturiana na que la única salida llaboral ye’l turismu o hostelería«. Detrás d’esta rabia de la que fala Ferla Megía ta una de les razones del surdimientu de PVXARRA, grupu nuevu de la escena que naz güei cola publicación de ‘TIESLO TOU (NUN QUIES NA)’, un single que tresllada esa brenga a un soníu contundente y a unes lletres con un mensaxe críticu nidiu.
PVXARRA ye un tríu formáu pol mentáu Ferla Megía a la producción, Cosme a les lletres y voz y Argu al baxu. La so referencia son grupos como Death Grips, IDLES, Kneecap, Chill Mafia, Aphex Twin y soníos como’l punk, rock n’ast, hardcore o drum&bass; «coses que nos presten y que nos faen sacar la rabia de dientro», desplica Megía sobre esti grupu que naz de la so amistá colos otros dos componentes y de los descartes que l’artista multidisciplinar fixo pal so propiu proyectu: «dende va un par d’años tolo que producía pa Ferla que me paecía mui cañeru guardélo nuna carpeta cola intención de facer dalgo paecío notra formación».
«‘TIESLO TOU (NUN QUIES NA)’ grabámoslu’l primer día que quedamos pa facer daqué de manera seria. Tábemos sintiendo Fontaines DC y ocurrióseme samplear un cachín; Cosme púnxose a escribir y a la fin acabamos con un cantar mui cañeru», desplica’l productor al rodiu d’esti primer single que fala «de cómo les rellaciones interpersonales agora mesmo tán feches pa consumir«.
«A lo primero díbemos llamanos Ferramienta/Fesoria, pero como se convirtiera nun meme dientro’l nuestru grupu de collacios, pensamos nun nome más seriu y puxarra foi una revelación. Llueu enterámonos de qu’en 1990-1991 hubo un grupu que se llamaba Puxarra y decidimos poner la V pa nun xenerar confusión«. Llueu d’esti llanzamientu va haber munchos más; Ferla afirma que yá tien «más de quince temes fechos» y que van «intentar llevar la rabia de PVXARRA al escenariu l’añu qu’entra«. Mentanto, esta contundencia xorrez nun proyectu qu’amuesa una vegada la versatilidá, dinamismu y anovación que ta esperimentando la música asturiana.
Suscríbite a les nuestres novedaes
