Va unos díes presentáronse a traviés de les redes sociales Taragañu, una banda nueva formada por componentes que vienen de grupos como Desaniciu, Sin Emu, Tygers of Wrath o Bristol Bulldogs y que ta influenciada por estilos que van del street punk y el Oi! al metal y el hardcore. El sábadu 14 de marzu al mediudía van estrenase con un conciertu nel CSA La Xusticia de La Felguera dempués del alcuentru qu’hai colos míticos viñetistes Encarna Revuelta y Carlos Azagra.
«Nun mos gusta zarramos a una etiqueta, unos venimos más del street punk y el Oi!… Otros del punk más ibéricu, del rock o del metal y el hardcore… D’esti mecigayu vamos faciendo y corrixendo pa topar un puntu onde toos tamos agusto tocando», desplica Gema Fernández Alvárez, vocalista d’un grupu formáu tamién por Rafa al baxu -«tráinos munches de les melodíes que terminen en canción»-; a les guitarres Víctor y Karlinos -«ún de Sariegu y un ayerán»-; y Miguel: «foi l’últimu n’aterrizar; vieno de Cádiz a vivir a la Cuenca y encárgase de da-y trombios a la batería», comenta la cantante al rodiu d’unos compañeros xunto a los que busca «sacar un soníu medianamente decente y disfrutar del procesu de xuntanos y crear».
La so propuesta naz tamién con una idea mui clara: «Lo que nos une a los cinco ye la conciencia de la clase a la que pertenecemos y usar la música pa tresmitir idees pero siempre como una parte d’una llucha que tien la so máxima espresión nes cais«. D’esta manera esparden un mensaxe mesmo n’asturianu qu’en castellán, «dependiendo un poco quien apurra la lletra o lo que mos salga». «Lo que sí tenemos ye un compromisu firme cola llingua asturiana y cola so oficialidá. Entendémoslo non namás como una manera de falar, sinón de ser, pensar y sentir«, añade Fernández Alvárez.
El sábadu 14 de marzu va ser la primer oportunidá pa ver a Taragañu en directo. El Centru Social Autoxestionáu La Xusticia de La Felguera entama dientro de los actos pol so X Aniversariu un alcuentru colos pernomaos viñetistes Encarna Revuelta y Carlos Azagra y, n’acabando la charra, va actuar esti grupu nuevu xunto a los llioneses El Último Tornillo. Too ello nuna actividá con entrada llibre na que va haber tamién cerveza artesano y pinchos de baldre.
Suscríbite a les nuestres novedaes
