La revista dixital sobre artes y humanidaes ArtyHum publica na so última entrega (númberu 89, correspondiente al mes de xunu) un artículu tituláu «La construcción de la memoria en el repertorio del grupo Nuberu», firmáu pol historiador David González Palomares. Nel mesmu, l’autor analiza les rellaciones ente los testos del dúu musical asturianu y les distintes construcciones de la memoria que se dan nelles.
La música ye ún de los constructores de la memoria colectiva, actuando ésta como un mecanismu d’identidá, ideoloxía y cohesión grupal a partir d’un averamientu al pasáu dende’l presente. Con esta tesis central González Palomares rescampla la relevancia sociopolítica de les canciones de Nuberu dende la llamada Transición hasta anguaño, abanderando dende l’arte la memoria colectiva d’izquierda y l’asturianismu. El primer bloque del estudiu escomienza con una aproximación a la construcción de la memoria, na que s’espliquen xenéricamente les sos característiques y céntrase na música como elementu xenerador de memoria. Darréu, fai una contestualización espaciotemporal pa conocer la realidá económica, cultural y social de les cuenques mineres asturianes. Por últimu, analiza la historia del grupu, col aquello d’entender la so trayectoria y los factores que lleven a la composición del so repertoriu.
El segundu bloque dedícase al análisis d’esi repertoriu, dixebrando les sos lletres en dos apartaos principales de memoria: la histórica-política y l’asturianista. Na primer estaya examínense tres cantares («Aida de la Fuente», «A los fugaos» y «Pozu Funeres») y na segunda otres tantes («Dios te llibre de Castiella», «Asturies, tiempu de nosotros» y «Atiendi, Asturies»). Va esgranándose’l testu de toes elles, entesacando les estrofes fundamentales, falando del conteníu y los fechos que narren, ensin escaecer tamién l’aspectu estrictamente musical.
Ún de los aspectos que fai notar l’autor ye la capacidá d’un cantar pa crear lo que llama momentu de la memoria, nesti sen diz: «Un momento donde la gente canta, se divierte, pero al mismo tiempo hace el ejercicio de recordar, pensar lo que dice la canción y también transmitirlo a quienes escuchen por primera vez la melodía. Por otro lado, existen canciones que están muy fuertemente ligadas a lugares de la memoria. Tal vez porque la canción hable de dicho lugar o de lo sucedido en él, o bien por tradición ceremonial se cante en los actos de ese espacio». Como conclusión, puede afirmase que Nuberu collabora significativamente n’Asturies nel combate de les memories dende abaxo contra les oficiales.
ArtyHum preséntase como una revista dixital de calter cuatrimestral pa personal investigador y profesionales de les Artes y Humanidaes. David González Palomares ye graduáu n’Historia y doctorando con contratu de Formación de Profesoráu Universitariu del Departamentu d’Historia de la Universidá d’Uviéu nel área d’Historia Contemporánea; ye, amás, especialista n’historia y patrimoniu mineru y industrial asturianu.
Suscríbite a les nuestres novedaes
