Güei entamen les fiestes de San Mateo y, dientro de la programación oficial entamada pol Ayuntamientu d’Uviéu, hai delles actuaciones de música’l país. Ente’l 12 y el 28 de setiembre van tocar los artistes Ferla Megía y Ochobre; les bandines La Xarangana y Xácara; les bandes de gaites Ciudad de Oviedo, La Laguna del Torollu, Naranco y Centro Asturiano; les agrupaciones de baille y música tradicional Fitoria, Nocéu, Trasgu, Filandón, La Xordia, La Hedra, La Inmaculada, A Media Legua y Centro Asturiano; y va representase l’espectáculu 13 Reyes.
La programación arranca güei xueves a les 20h col pregón na Plaza del Ayuntamientu nel que va participa la Real Banda de Gaitas Ciudad de Oviedo, que va facer delles actuaciones nestes fiestes. L’escenariu ALaPlaza -impulsáu pola candidatura a la capital cultural europea 2030- va acoyer los conciertos na Plaza’l Paragües de Ferla Megía (sábadu 13 a les 20h) y Ochobre (xueves 18 a les 21h) , xunto a otra montonera d’artistes de dientro y fuera d’Asturies que representen los soníos más underground y llocales de la programción oficial.
Dende’l sábadu 13 tamién va tar bien presente la música tradicional cola actuación de La Xarangana na programación de Charangas y el ciclu de folclore nel que participen los díes 13, 14, 20, 21, 22 y 27 toles agrupaciones tradicionales y bandes de gaites yá mentaes.
El sábadu 27 a les 19.30h nel Jardín de los Reyes ye l’espectáculu 13 Reyes Asturianos de la Banda Gaites La Laguna del Torollu y la Banda Sinfónica del Atenéu Musical de Mieres y, al día siguiente, celébrase la Romería del Cristo cola participación de la Real Banda de Gaitas Ciudad de Oviedo, el grupu de baile Nocéu, l’asociación de baile y música tradicional La Xordia y l’asociación folclórica La Hedra.
Al marxe de la programación oficial entamada pol Ayuntamientu d’Uviéu, otros colectivos y llocales tamién programen música n’asturianu nestes fiestes. Una muestra d’ello ye’l conciertu qu’Ún de Grao va dar el sábadu 13 a les 20h na caseta La Verdina, asitiada na Plaza la Catedral. Amás, Fiestes Populares Uviéu -que tien trés chiringuitos en Porlier y ún na Plaza La Catedral- tamién anunció que van tener «una programación festiva, diversa, popular, participativa y que refuga’l modelu de fiestes privatizaes qu’impulsa’l PP de la mano d’OTEA» y na que tolos años programen daqué de música n’asturianu.
Suscríbite a les nuestres novedaes
