El pasáu mes de xunetu vio la lluz en toles plataformes musicales Son d’Ermu, el primer trabayu de Picarós. Agora esti tríu de folk celta llanza una edición llimitada en formatu físicu que yá ta a la venta en musicasturiana.com y que recueye estos diez temes de composición propia qu’entemecen tradición y soníos contemporáneos. Esti primer álbum presentóse en directo na final del Concurso Runas del Festival Internacional do Mundo Celta de Ortigueira, ta grabáu nos Tutu Estudios de Corvera y ye una amuesa de la identidá musical y autenticidá que’l grupu quier reflexar.
Picarós nació nos valles del Trubia en 2021 formáu por Iván Álvarez (gaites asturianes, gaita MIDI, whistles y voz), Daniel de la Nava (guitarres) y Chus Fernández (bodhrán). La banda tien l’envís de buscar un soníu frescu y vibrante mediante la esperimentación sonora y l’amiestu de xéneros. Ente les sos influencies tán formaciones asturianes y foriates como Flook, Michael McGoldrick, Tejedor o Llan de Cubel.
Suscríbite a les nuestres novedaes
