Porrúa acueye esti sábadu 22 y domingu 23 d’agostu una edición nueva del so Mercáu, una de les grandes cites del calendariu festivu del Oriente d’Asturies y un referente de los mercaos tradicionales del país. La programación musical va tener un protagonismu especial, con actuaciones de grupos de baille, asturianada y bandines, amás de los pregones d’Héctor Braga.
El doctor en Musicoloxía y músicu tradicional va poner voz a los pregones de les dos xornaes, con intervenciones a les 12.30 y 17.45 hores del sábadu y a les 12.45 y 17.45 hores del domingu. Darréu, continúa la programación. El sábadu, el programa va arrancar a les 12.50 hores col Grupu Etnográficu L’Oriente-Llacín, siguíu a les 14.30 por Filandón. Pela tarde, a les 18.00 hores, va ser el turnu de La Bandina Llacín, y a les 18.30 hores aporta la tonada asturiana con AICA (Asociación d’Intérpretes de Canción Asturiana). El día remata col conciertu de música tradicional: a les 23.00 hores actúen Gaiteros Llacín, Los Indianos La Maleta l’Agua y Los Gascones.
El domingu 23 la programación continúa con Filandón en dellos momentos de la mañana y la tarde. A les 18.00 hores van actuar los Gaiteros de Llacín, y a les 20.15 hores tona al escenariu’l Grupu Etnográficu L’Oriente. La Danza Prima, a les 21.00 hores, va axuntar a Filandón y al Grupu Etnográficu L’Oriente-Llacín, enantes del Escenariu Abiertu pa la música y el baille, previsto pa les 21.30 hores.
La música va integrase nun programa más ampliu que convierte Porrúa nun escenariu de tradición, artesanía, gastronomía, xuegos y espectáculos. El Mercáu, organizáu pola Asociación Cultural Llacín, celebra en 2026 una edición na que vuelve a convertir al pueblu llaniscu nun espaciu onde la cultura tradicional asturiana convive con personaxes fantásticos, oficios y actividaes pa tola familia.
Suscríbite a les nuestres novedaes
