«Preocupámonos de que tolos temes caltuvieren un guión sonoru con ciertes carauterístiques comunes por más que xuguemos con entemecer estilos diversos»

Hai nueve díes que Guieldu llanzaron en toles plataformes musicales el so primer trabayu discográficu, Memories de Deva. Nél recueyen catorce temes que puercuerren los soníos de raigañu del Arcu Atlánticu, amestándolo a otros estilos como’l folk progresivu, la new-age, el folk rock, el funk o’l smooth jazz. Ye un discu qu’aporta dempués de qu’esta xoven formación entamara’l so camín en 2020 y llanzara un cenciellu por añu dende’l 2021. El 3 d’abril ve la lluz el formatu físicu del discu y esi mesmu día van presentalu nel café Trisquel de Xixón con una audición. Nesta entrevista afondamos na obra y nel trabayu que lleva faciendo esta formación celta.

Primeramente, ¿qué hai detrás del títulu Memories de Deva? ¿Cómo surdió la idea?

Queríamos daqué qu’evocara’l romanticismu celta decimonónicu: mitoloxía, naturaleza… y la mar como nexu. Dimos-y vueltes ensin atopar nada que nos convenciera, asina que pidimos ayuda al poeta ‘Llope’, qu’escribe n’asturianu. Memories de Deva foi la so primer idega: curtiu, amestáu a Asturies, conectáu al celtismu, al puertu d’Avilés y con un chisgu “internacional” porque “memories” dizse lo mesmo n’asturianu que n’inglés, y asemeyao en francés. Teníalo too.

«El nome Memories de Deva tienlo too: ye curtiu, amestáu a Asturies, conectáu al celtismu, al puertu d’Avilés y con un chisgu “internacional” porque “memories” dizse lo mesmo n’asturianu que n’inglés, y asemeyao en francés»

Sabemos que ye un discu con un formatu físicu especial, ¿qué podéis contanos sobre ello? ¿Y sobre’l diseñu?

Tien un formatu daqué diferente a lo que se lleva güei. Decidimos usar la clásica caxa de plásticu y non facelo en cartón porque la jewel-box trespórtanos a la dómina que nos inspira y, amás, ye perafayadiza pa quienes siguen esfrutando del formatu físicu a diario; nun s’estropia tan ceo. Esi aire señardosu cuélase tamién n’otros detalles de la edición pa quien tenga vista.

Pal arte de portada -y contraportada- escoyimos a Sara Balsera ‘Solombra’, una artista asturiana que nos cautivó cola so obra dende’l primer momentu. Les sos creaciones, trescalaes d’esi romanticismu decimonónicu y d’un simbolismu oníricu, reflexen perfeutamente l’alma de la nuesa música. Sara captó la esencia de tolo que buscábamos. Vese la bocana la ría, puerta al Atlánticu, que s’abre so la lluz del faru San Xuan, onde un veleru ta enfrentándose al míticu «peludín», el calamar xigante qu’habita nes fondures de la nuesa mariña. Y claro, la islla de la Deva, diosa celta convertida en roca, que repara esi alcuentru. Too esto recuerda esa visión romántica ya interceltista que nos interesaba reflexar.

Llueu la maquetación corrió por cuenta Pablo Santamarta, el nuesu baxista, qu’amás de bon músicu ye diseñador gráficu y tien maquetao l’arte de discos de más bandes. Presta que tea too fecho Km-0, dende la grabación, nos Estudios 15:40 de Gozón, hasta la fabricación na Factoría del Ruiu d’Avilés.

A lo último, a la xente más averada al folk clásicu, tien de llama-y l’atención qu’apaeza’l sellu Guimbarda. Eso tien una esplicación bien prestosa. Guimbarda foi un sellu discográficu fundáu en 1978 pol periodista musical Manuel Domínguez que se caltuvo hasta 1985 y afata’l nuesu discu como homenaxe al so influyente llabor. Guimbarda averó al públicu d’equí a artistes como Alan Stivell, Dan ar Braz, Malicorne, The Tannahill Weavers, Boys of The Lough o Pentangle, que foron referentes pa l’entamu la escena folk asturiana. Pa poder incluyilo, comentámoslo primeru con José Miguel López (Discópolis, Radio 3), quien coneutónos con Lucía Domínguez, fía de Manuel, llogrando asina l’autorización pa que Memories de Deva lluciera esti emblema yá históricu, que por cierto nun ta en nengún otru CD porque d’aquella editaben too en vinilu y cassette.

«A la xente más averada al folk clásicu tien de llama-y l’atención qu’apaeza’l sellu Guimbarda qu’averó al públicu d’equí a artistes como Alan Stivell, Malicorne, The Tannahill Weavers… que foron referentes pal entamu de la escena folk asturiana»

El llibretu del discu tien tamién una importante parte narrativa. Si podéis afondar nello…

Intentamos que la nuesa música tresmita ciertes imaxes, que recuerde ciertos paisaxes, anque’l discu nun ye un trabayu que pensáramos d’un xeitu conceptual, porque ye abondo complicao facer un primer discu d’esa manera. Pero sí preocupámonos de que tolos temes caltuvieren un guión sonoru con ciertes carauterístiques comunes por más que xuguemos con entemecer estilos diversos. Esto dionos pie a escribir unes llinies evocando la lliteratura romanticista, como si fueren escrites nun cuadernu de campu por daquién que ta pasando una temporada nel Avilés de finales del XIX. Lleelo demientres suenen los temes ye bien prestoso, y da-y otra dimensión a la hora sentilu. Daqué que nun se ye a apreciar nes plataformes dixitales.

Hevia y Bieito Romero escriben testos nel álbum. Ye daqué inusual que xente con tanto renome dexe la so buelga asina nel primer álbum d’una formación ¿Qué significa a vos?

Pa nós ye un honor inmensu, y al empar, una gran responsabilidá. Que figures d’esti calibre musical, con trayeutories tan respetaes y enraigonaes na música celta quixeren apurrir les sos impresiones nel nuesu primer discu enllénanos d’arguyu. Significa que creen no que tamos faciendo, y eso danos una motivación pergrande para siguir alantre y tar al altor d’esi enfotu. Ye como un respaldu que nos coneuta col heriedu musical qu’almiramos.

«Que figures como Hevia y Bieito Romero quixeren apurrir les sos impresiones nel nuesu primer discu enllénanos d’arguyu. Ye un respaldu que nos coneuta col heriedu musical qu’almiramos»

Vais entamar una presentación orixinal pa los tiempos d’anguaño, pero con un venceyu históricu a les décades de los 70 y 80 en Xixón, en formatu d’audición comentada, ¿por qué esi formatu?

Xuntamos la necesidá cola conveniencia. Pol tipu banda que somos nun se nos arregla facer conciertos íntimos, asina que necesitábamos buscar una fórmula pa sentir les pieces cola xente y dedicar un tiempu a desplicar coses como les que tamos comentando. Revolviendo peles hemeroteques pa otros trabayos nuesos, vimos qu’en Xixón solíen facese mientres la Transición audiciones comentaes y prendiósenos la bombilla. Falamos con Ramón el del Trisquel y paeció-y fabuloso. Llueu falamos con Arantza Margolles pa que faiga de conductora y quede más ameno, asina qu’el prósimu 3 d’abril vamos facer l’Audición comentada de Memories de Deva y va tar bien guapo.

Siempre facéis una defensa cultural del términu “celta”, ¿qué significáu y implicaciones tien pa vós? ¿Ye un términu obsoletu o vixente dafechu?

Lo celta ye una idea discutible y discutida, hai óptiques estremaes pa velo. La nuesa ye que música celta, na so esencia, tien de ser interceltista, una ponte qu’axunte culturalmente los pueblos del Arcu Atlánticu européu. Sicasí, el propósitu tresciende nesti casu lo puramente sonoro-musical; busca texer rede al rodiu d’esi heriedu cultural, dando-y fuercia a la identidá coleutiva. Visto asina, el folk asturianu, irlandés o bretón ye eso, folk, al que podemos vistir cola capa de música celta si atendemos a unos cánones estilísticos, atmosféricos ya idealistes.

Habrá diferentes óptiques igual de válides pa ver too esto, pero si tomamos en cuenta lo anterior ye difícil pensar que pueda ser un términu obsoletu porque nun hai otro sustitutivu. ¿El nuesu discu, si nun ye de música celta, de qué ye entós?

«La música celta tien de ser interceltista, una ponte qu’axunte culturalmente los pueblos del Arcu Atlánticu européu. Sicasí, el propósitu de defender el términu busca texer rede al rodiu d’esi heriedu cultural, dando-y fuercia a la identidá coleutiva»

Nesti discu pueden sentise 14 temes; munchos son melodíes tradicionales reinterpretaes dende’l vuesu soníu, pero ¿cuál ye col que más vos identificáis, el que más suena a Guieldu?

Nun ye nada cenciello dicir una. El discu enteru condensa la esencia de Guieldu ya’l nuesu gustu revival. Quiximos que quedara reflexada la bayura d’estilos de la nuesa música.

Podríemos dicir que navegamos ente dos agues: la New-Age de les balaes evocadores, místiques y atmosfériques al estilu de les power-ballads; y la parte más potente que tira pel Rock Celta clásicu. Del primer casu quiciabes seya bon exemplu ‘El cantar de la Texedora’, que pue recordar a Clannad; y del otru, ‘Laridenn eus Asturiez’ que ta inspiráu claramente nos soníos de los bretonos Tri Yann.

D’escoyer una namás, el tema que meyor pudiera defininos en tolos sentíos ye ‘Asturies danza na Celtia (Pumba-Dai)’, que surde d’una danza de corru tradicional bien conocida n’Asturies a la que-y camudamos la lletra pa dotala d’un significáu interceltista y d’arguyu pola nuesa presencia nel mundu celta; la nuesa filosofía resumida nuna tema.

«El discu enteru condensa la esencia de Guieldu ya’l nuesu gustu revival. Quiximos que quedara reflexada la bayura d’estilos de la nuesa música»

Sicasí, les siete persones qu’anguaño formáis Guieldu tenéis unos intereses musicales y una trayectoria bien estremada. Amás, destaca la bayurosa formación musical de cada intérprete que da forma al proyectu. ¿Cómo se reflexa esto nel grupu?

Efeutivamente, caún de nós tien una trayeutoria y formación musical distinta, amás de qu’hai integrantes que tán tamién n’otres bandes de xéneros totalmente estremaos. Esto faise evidente en bien de coses: dende’l nuesu llinguaxe corporal nel escenariu, pasando pola afinidá por un tipu d’arreglos o otros, hasta’l xeitu que tenemos d’entendenos nos ensayos ente quienes dicimos “la tercer corchea sincopada del compás 56 dempués de que modula a fa sosteníu mayor”, y los que dicimos “ehí, cuando suena’l pum-pum”. Na música de Guieldu ye au atopamos la xuntanza ente les nueses influencies. Caún tratamos d’apurrir lo que se nos da meyor, qu’inevitablemente alude a los gustos, maneres de facer y de sentir la música que trayíamos de casa, y tratamos de ponelos en común. La música que facemos ye un campu aparente pa esquilar estes diferencies, pero non pa escondeles nin disimulales. Na midida lo posible buscamos incorporar eses característiques a la nuesa música pa que seya distintiva y especial.

«Caún de nós tien una trayeutoria y formación musical distinta. La música que facemos ye un campu pa esquilar estes diferencies, pero non pa escondeles nin disimulales. Buscamos incorporar eses característiques pa facer dalgo distintivo y especial»

El procesu de grabación y producción de los trabayos discográficos anguaño ye bien diferente de cómo yera va una década, tamién pola influyencia de la industria y les sos velocidaes. Dalgunos de los temes yá los asoleyastis va tiempu como singles y agora los recuperáis nesti álbum, ¿cómo foi esi procesu? ¿Qué trabayu ficisteis con ellos?

‘L’Aremu’ y ‘Irish Fleadh’ grabámoslos en so día de manera totalmente casera, asina que tuvimos que revisalos pa cuadralos a nivel de calidá de soníu col restu l’álbum. Volvimos grabar de cero ‘Irish Fleadh’, aprovechando pa subi-y un poco el tempo porque nos conciertos damos-y más cera y con ‘L’Aremu’ regrabamos nel estudiu dellos instrumentos y la voz. Llueu n’otres temes retocáronse detallinos pa unificar sonoridaes.

Lleváis yá tiempu faciendo conciertos con parte del repertoriu que suena nel discu, ¿cómo se compaxina eso cola grabación y los cambios que pueden producise nel estudiu?

Ente’l direutu y les grabaciones hai diferencies perimportantes. Nun ye lo mesmo dir a venos tocar a un festival que tien una puesta n’escena, unes lluces, un soníu y una predisposición del públicu a divertise, que sentir un discu en casa poniendo el cien por cien d’atención en cada canción; poro, la forma de facer música y d’arreglala pa rexistrala nuna grabación ye, pa nós, diferente a l’actuación en vivo, porque nel discu hai de tar pendientes de crear una obra que tenga les suficientes capes y matices como pa que l’oyente pueda recrease nel tema ya incluso percibir coses nueves con cada escucha.

Amás d’eso, grabar nun estudiu permítete una total llibertá más allá de lo que físicamente puedas facer en vivo, como grabate cinco vegaes tocando diferentes instrumentos, facer coros a la par que toques, esplorar efectos… Munches de les pieces del discu son trabayos bien complexos a nivel de capes de soníu pa conseguir que tolos instrumentos ocupen el so llugar. Esi ye’l gran trabayu de Luis Senén nos Estudios 15:40, onde sentímosnos yá como nel nuesu llar.

«Grabar nun estudiu permítete una total llibertá más allá de lo que físicamente puedas facer en vivo. Munches de les pieces son trabayos bien complexos de Luis Senén nos Estudios 15:40 pa conseguir que tolos instrumentos ocupen el so llugar»

Sois amás una banda autoxestionada dafechu. ¿Ye por voluntá o por necesidá?. ¿Qué ventaxes y inconvenientes topáis nesta fórmula de trabayar?

Qué bones preguntes. ¿Por voluntá o por necesidá? Bono, un poco poles dos coses, pero sobremanera porque nun somos agora mesmo precisamente’l suañu de les empreses de management. Somos siete músicos, con una cantidá d’instrumentos tremenda, y eso complica la lloxística: los tresllaos, les necesidaes técniques, agospiase… too cuesta más que con bandes pequeñes, pero tampoco pue disparase’l caché, asina que somos conscientes que, nesti sen, anguaño nun tenemos atractivu abondo a nivel empresarial. ¿Aféctanos? Sí, porque déxanos fuera de los catálogos d’estes empreses de management que s’ocupen de la dirección artística de munchos festivales y que, lóxicamente, tienden a priorizar a les bandes que representen. Pero, anque esto ye una torga, va compensándose cola fuercia de los nuesos siguidores, que piden ver a Guieldu y son quien nos salven, puxando pa que toquemos nos festivales que más-ys presten.

Per otru llau, ser autoxestionanos tamién tien la so parte bona, eh. Danos llibertá pa trazar una fueya de ruta propia, ensin comprometer a terceres partes. Gústanos espaciar los conciertos, mesmo nel tiempu que nel espaciu xeográficu, pa nun fartar al públicu. Queremos que cada actuación seya especial, qu’haiga ganes de venos ente la xente, dispuesta a facese 100, 200 o 500 km pa esfrutar de Guieldu. A la fin, ye una forma de caltener viva la conexón ya l’interés y que cada conciertu seya únicu de verdá.

«Nun somos agora mesmo’l suañu de les empreses de management, pero autoxestionanos tamién tien la so parte bona. Danos llibertá pa trazar una fueya de ruta propia, ensin comprometer a terceres partes»

Trabayáis con una bayura de referencies y influencies del folk asturianu y internacional, pero, ¿qué artistes marcaron más les pieces del discu?

Toles composiciones son propies, cola base siempres de la música tradicional, pero efeutivamente hai músiques que marquen les distintes pieces y la xente que yá sintió’l discu y comparte gustos musicales con nós dase cuenta. Amás de les que comentamos enantes, podríemos dicir que ‘Óise l’Ixuxú’ tórnanos ensin dúbida a los tiempos de N’Arba y Brenga Astur; ‘Ayer vite na Fonte’ tien esi toque a l’estilu Loreena Mckennitt o Luar na Lubre; ‘Angueira’ a dalgunos temes de Capercaillie; ‘Irish Fleadh’ va a l’estilu de los canadienses Leahy; ‘Flor d’Artu’ o ‘Asturies danza na Celtia’ pueden venceyase al soníu d’Hevia en Tierra de Nadie; ‘Rondes’, coles voces de 6 Riales, quiciabes suxeren los primeros discos de Carlos Núñez; y ‘Eireann Set’ ta nídiamente influenciáu por Wolfstone. En tolos casos, salvando les distancies enormes que nos separen de bandes y artistes d’esi altor.

En Memories de Deva cuntáis tamién cola collaboración de 6 Riales y Pepín de Muñalén, que yá grabara con vós va un tiempu, ¿cómo surdieron dambes andeches y qué aporten al resultáu final?

Si daquién ve’l llibretu enantes de sentir el discu y llee la particiación de Pepín en ‘Flor d’Artu’ y ‘Angueira’, de xuru que nun espera unos solos de saxofón al estilu pop de los primeros 90s. Prestónos pola vida que nos dixera que sí. Pepín ye una figura importante de la música tradicional asturiana qu’equí salióse un poco de lo que ye habitual nél, y el resultáu ye magníficu.

Con 6 Riales tuvimos un flechazu yá cola so primer maqueta, enantes de sacar el discu Sutripar. Cautivónos el timbre de les sos voces porque tábemos a la gueta precisamente d’un rexistru agudu asemeyáu al de los alalás gallegos que, por ciertu, tuvieron que llevar hasta la llende nel estudiu. La so participación nel tema más esperimental del discu ye lo más distintivo de la so aportación, pero tamién punxeron el so granin n’otres pieces, con ixuxús y percusiones tradicionales.

«Cuando entamamos la banda, yá tuvimos nidia la importancia de la puesta n’escena. Tenemos que facer del conciertu una esperiencia que faiga que la xente quiera sentinos y venos otra vuelta»

Pa finar, paez que vamos poder vevos pronto enriba l’escenariu. Dende l’entamu caracterizaisvos por caltener nos directos una estética, puesta n’escena y enerxía propies, ¿qué importancia tienen en Guieldu estes cuestiones? ¿Cómo pensáis que lo valora’l públicu?

Cuando entamamos la banda, yá tuvimos nidia la importancia de tolo que tien que ver cola puesta n’escena. Una actuación en vivo nun ye solo música sonando, hai tamién una parte visual y, énte too, unes emociones que tresmitir. Les bandes veteranes tienen la ventaya de que les sos canciones yá formen parte de la banda sonora vital de la xente y despiértennos eses emociones al momentu, colos primeros acordes; nun necesiten más pa espertar emociones nel públicu porque les sos melodíes y lletres formen parte yá de la memoria colectiva de una o más xeneraciones. Con un bon soníu lo demás ye acesorio, porque’l públicu yá ta emocionalmente conectáu enantes que xuban al escenariu. Pero una banda nueva, como nós, nun tien nada d’eso; hai que subir al escenariu y espertar l’atención dende cero. Nun val sonar bien -si hai suerte-; tenemos que faer del conciertu una esperiencia que faiga que la xente quiera sentinos y venos otra vuelta. Ye ablucante cómo pue camudar dafechu l’actitú del públicu nun conciertu dependiendo de l’actitú que tengas enriba l’escenariu.