La selmana pasada anuncíabase la programación completa de la Folixa na Primavera 2025 de Mieres. Ente la montonera d’actividaes destaca’l conciertu de Skanda, formación de folk-rock amestáu con otros estilos que lleva diez años ensin xubir a un escenariu y que lo va volver a facer el sábadu 5 d’abril a les 22h nel Parque Xovellanos de Mieres. Amás nun tornen solos, porque pa esta ocasión tan especial van tar acompañaos de la Banda Sinfónica del Atenéu Musical de Mieres y de la Banda de Gaites Villa de Mieres dando forma a lo que Pepe Fueyo, voz y guitarra del grupu, define como «un conciertu Made in Mieres con 90 persones nel escenariu interpretando temes clásicos de Skanda d’una manera qu’enxamás se sintieren enantes».
«Desque se formó la banda sinfónica del Atenéu de Mieres nel 2018, Chema Castillo, ún de los fundadores, lleva cola idea de resucitar a Skanda y preparar un conciertu sinfónicu con nós. Paeciónos dende’l minutu cero, un proyectu superinteresante a nivel tanto creativu como musical, comentámoslo cola Conceyalía de Festexos del Conceyu y sofitaron la idea dende’l primer momentu», desplica’l músicu sobre esta iniciativa.
D’esta manera, el conciertu del sábadu 5 va facer «un repasu a los 19 años de trayectoria del grupu, colos arreglos sinfónicos de Carmen Loriente -arreglista, saxofonista y miembru activu del Atenéu-; y les igües de banda de gaites de Jorge Areces, profesor de gaita, fundador de la banda Villa de Mieres y sobremanera, bon amigu», como comenta Fueyo, que nun descarta «dalguna sopresina más».
En 2015, cuando esta mítica banda tenía recién sacáu del fornu’l CD-DVD 18, dexaron los escenarios: «Lo primero foi por motivos llaborales; una incompatibilidá total d’horarios y disponibilidá. Lo segundo que llevábamos 19 años xuntos, seis discos y milenta conciertos y quiciabes sentimos una necesidá de pesllar un ciclu. Doliónos a toos y toos en mayor o menor midida y echámoslo de menos estos años», comenta’l vocalista de Skanda.
«Hasta agora nun plantegamos nengún plan futuru. Vamos esfrutar esti momentu y dempués, ver veremos…», añade sobre les intenciones del grupu. Sicasí, una cosa sí que tien clara: «Sería una pena qu’esti proyectu quedara nun solu conciertu. Ye innovador nel panorama musical asturianu, toles partes tán comprometíes al cien per cien y ye un conciertu totalmente exportable pero tamién hai qu’entender qu’a nivel técnicu ye un espectáculu de gran complexidá y mover a tanta xente nun ye fácil. Por supuesto, encantaríanos repetir«. Mentanto, el 5 d’abril en Mieres, los siguidores del folk-rock del país, va poder ver a esti grupu fundamental de la escena nun formatu únicu.
Suscríbite a les nuestres novedaes
