Hai poco más d’un añu presentóse PVXARRA, un tríu qu’anovó la escena sonora asturiana con una propuesta qu’entemez punk, electrónica, hardcore, rap, reguetón y otros estilos. Tres de dir asoleyando singles tou esti tiempu, publicar una maqueta y xirar pel país, el grupu va llanzar el 5 d’ochobre el so primer discu, Ábrome en canal (lo que pasó darréu va ablucate), y tán acabante d’estrenar el so adelantu: ‘BARRU (HG++OI»)‘, que ye tamién ún de los temes que va sonar nel conciertu que dan esta nueche na Plaza’l Paragües d’Uviéu.
«Da-y vueltes a los conceptos amor/desamor y xunión/dixebra. Compara los cuerpos con estructures que puen ser dañaes pol clima y la maleza si s’abandonen. Toles cases d’ un pueblu muéyense si orbaya y toles persones d’un pueblu puen vese afectaes pol mesmu problema», desplica Ferla Megía, productor de PVXARRA, sobre un cantar «rapeáu, recitáu y berráu» que califica como «un derramamientu de tripes».
En cuantes a la música, Megía destaca que’l tema «replica la lletra de Cosme». Asina ye como «nel entama ataca con fuercia con un sampléu frenéticu de Juicy Bae más una gaita, pa más tarde aposentar nun tramu más relaxáu. Hacia’l final, esa base trap va garrando puxu y velocidá hasta que ruempe colo que podría ser l’estribillu».
Amás de a l’artista urbana sevillana y esa melodía de gaita, PVXARRA tamién samplea a la mítica banda rock Extremoduro nesti ‘BARRU (HG++OI»)’: «Mentanto Cosme va cantando ‘anque trates d’esquivalu, muéyanos el mesmu orbayu, les gotes que nun te caigan van tornase en barru’, va sonando de fondu la frase d’un cantar que tuvo mui presente nel tema, ‘Caballero andante (¡¡¡No me dejeis así!!!)’ d’Extremoduro. El poema final inspíranos muncho a tolos miembros y foi fundamental pal desarrollu la canción, por eso sampleamos la metá y la replicamos nel tramu final solapándose col estribillu», esclaria Megía.
«Esti tema ye un adelantu del nuestru primer discu, que sal el 5 d’ ochobre. Grabámoslu ente’l Valle de Turón y Valdesoto, pola nuestra cuenta. Va llamase Ábrome en canal (lo que pasó darréu va ablucate) y ye una compilación de les coses que fuimos faciendo esti últimu añu. Tenemos unes ganes tremendes de sacalu», añade’l xoven productor sierense.
Tres d’una primer parte d’una xira «mui completa y variada» que los llevó a «bares, CSAs, sales de conciertu, fiestes de prau…«, PVXARRA actúen esta tarde nes fiestes de San Mateo d’Uviéu. Va ser a les 21h na Plaza’l Paragües, dientro’l ciclu Alaplaza. «Vamos mete-y caña como siempre, con munchu caos y munchos glayíos. Tamién dedicaremos un momentu pa falar del matu del facismu nes cais«, añade Megía sobre un conciertu nel que tamién va sonar «dalgún tema del discu nuevu» que nun tocaren enantes en directo.
Con Ábrome en canal (lo que pasó darréu va ablucate) yá publicáu, el tríu va pisar el 10 d’ochobre el CSA La Xusticia y el 11 d’avientu va ser la presentación oficial del trabayu nos Kuivi Almacenes d’Uviéu. Mentanto, toca abrir boca con ‘BARRU (HG++OI»)’ y el so videoclip, una producción autoxestionada col espíritu Do It Yourself qu’acompaña a esti orixinal tríu dende los sos comienzos.
Suscríbite a les nuestres novedaes
