Dende la so reapertura pol míticu chigreru y activista cultural José «Caja», la Taberna Narciso vien puxando por programar música en vivo de mui estremaos estilos. El pasádu sábadu 14 de marzu llegó-yos el turnu a PVXARRA, esti tríu de recién creación qu’entemez punk, hardcore, rap, electrónica… con unes lletres marcaes por un discursu de crítica social y ironía. Yera’l so segundu conciertu dempués del estrenu nel IV Semando Fest y la banda formada por Cosme (voz y lletres), Argu (baxu) y Ferla Megía (producción) amosó otra vuelta la so solvencia enriba l’escenariu.
El conciertu tuvo caracterizáu pola enerxía, la conexón col so xovencísimu públicu y una propuesta divertida na que nun tienen cabida prexuicios nin dogmatismos. Tampoco l’Estáu d’Israel nin parásitos rentistes. Llueu de l’actuación hubo un bonísimu DJ Set al cargu de Ferla Megía nel que, mentanto sonaben temes de Chill Mafia Records o Omar Souleyman, taba proyectáu un videoxuegu pa que, quien quixera, garrara’l mandu y echara unes plays ente baille y baille. La comedia allargóse hasta les cinco la madrugada, nuna nueche de mocedá, diversidá y aire nuevo dientro la escena musical n’asturianu. Ángela Velarde Hevia tuvo ellí y cede a musicasturiana.com delles de les semeyes que fizo con cámara dixital compacta.
Suscríbite a les nuestres novedaes
