Esti xueves el plenu del Ayuntamientu de Samartín del Rei Aurelio aprobó la iniciativa de la Peña Amigos de Nuberu pa camudar el nome del Teatru Municipal de L’Entregu, qu’a partir d’agora va llamase Teatru Municipal Nuberu. D’esta manera, el dúu formáu por Chus Pedro y Manolo Peñayos rebautiza al principal espaciu escénicu del conceyu que los vio nacer hai cuarenta años.
Nuberu ye ún de los nomes imprescindibles de la música asturiana dende la so formación en L’Entregu en 1976. La so música ye la banda sonora de la Transición nesti país, con unos composiciones que-y canten a les llibertaes, a les lluches obreres, a la nuestra historia y identidá o al mundu de la mina.
Esti dúu forma parte del movimientu musical denomáu Nuevu Canciu Astur que puxó pola canción d’autor n’asturianu. Publicó seis álbumes d’estudiu, dellos compilatorios y dos directos; col últimu d’ellos, 30 Años, Yá Llovió, despidíense; anque davezu vuelven a xubir a los escenarios pa dar dalgunos conciertos o pa collaborar con otros artistes.
Suscríbite a les nuestres novedaes
