Como-yos comentaba esti sábadu a dalguna de les integrantes, Herbamora ye una parte importante de la banda sonora de la mio mocedá. Naquel contestu de los primeros dosmil, los años doraos de les nueches celtes, imperaba’l tirulaliru, como llamábemos con coña aquellos alardes de virtuosismu instrumental que triunfaben na escena folk d’Asturies. Sicasí, naquel ambiente folixeru, la xente como yo, con conocimientu y interés moderáu pol xéneru, facíemos por escuchar aquelles melodíes aceleraes y dar saltiquinos y palmes (porque pa baillar propiamente tampoco yera), ente culete y culete, aguardando que llegara dalgún tema cantáu o empezaren los grupos de rock, a les hores menos cristianes (güei impensables).
Nesi contestu, l’apaición d’un grupu de muyeres moces basáu na voz y la percusión tradicional foi una novedá mui agradecida por quien aceptaba aquellos sones que miraben pa Escocia o Irlanda como l’aperitivu onde’l platu fuerte yeren les canciones coles que se podía cantar. Herbamora abrazaba la tradición vocal, que daba la oportunidá al públicu de facer una fila pa baillar y tamién, polo menos, acompañar y facer un poco tuyos los cantares. Esta tradición de voz y pandereta, tresmitida al traviés de les muyeres principalmente, güei apréciase ensin reparos pol valor cultural y identitariu que ye claro que tien. Sicasí, daquella había una resquiebra, que cualquier persona con edá pa tener andao pelos foros d’Asturies.com recordará, ente lo folki y lo tradicional (tovía nun se popularizara’l términu tradi), acusándose a una facción d’estranxerizante y desvirtuadora y a la otra de rancia y ramplona, llegando a polémiques bastante fees y improductives (pero, confieso, entreteníes pa la observadora esterna que yera yo).
«Herbamora abrazaba la tradición vocal, que daba la oportunidá al públicu de facer una fila pa baillar y tamién, polo menos, acompañar y facer un poco tuyos los cantares»
Nel 2007 llegó Salí, l.luna, el primer discu d’Herbamora, un discu de temes tradicionales con unos arreglos mui modernos y innovadores, anque con una producción que quiciabes nun acertó a entender les dinámiques y los timbres de la pandereta y la voz femenina nel rexistru tradicional. A pesar de too, nun ta de más recordar que fueron el segundu grupu en facese col Premiu al Meyor Cantar (y el primeru en facelo en gallego-asturianu). Ello ye que, dende la conciencia de que dalgo nun acababa de funcionar, les propies Herbamores tuvieron l’arréu de versionase a elles mesmes nel discu N’acústicu de 2013, onde quitaron tolo que consideraron que nun facía serviciu a los cantares y los vistieron con una instrumentación más sutil y, sobre manera, col xuegu vocal, enllenando l’espaciu sonoru colos distintos rexistros de cada voz y arreglos que complementaben la llinia principal tanto harmónica como rítmicamente.
Y nesto llegó la crisis, esa que vieno a romper la burbuya de les nueches celtes y a vaciar los presupuestos de Cultura, y tamién coincidió con un momentu vital onde hai decisiones que tomar, que nel casu de les muyeres vienen con condicionantes particulares (d’esto podía falase llargo y tendío), y el proyectu Herbamora salió de la esfera pública, lo que nun quier dicir que quedare pa prau nin morriera.
«La crisis coincidió con un momentu vital onde hai decisiones que tomar, que nel casu de les muyeres vienen con condicionantes particulares y el proyectu Herbamora salió de la esfera pública, lo que nun quier dicir que quedare pa prau nin morriera»
Asina foi que, como les herbes del campu, cuando les condiciones foron propicies, Herbamora –Elena Rodríguez Martínez, María Gavieiro Álvarez, Paula Cristóbal Caso, Natalia Nuño Rodríguez y María Vázquez Álvarez- renació con una fuercia nueva. ¿Cuáles son estes condiciones? Podíemos pensar qu’a nivel social hai un mayor y merecíu apreciu pola música de tresmisión oral y la percusión tradicional, favorecíu tanto pol llabor de programes como Camín de Cantares y les sos secueles, que fortalecieron l’autoestima colectiva, como pol rexurdir de la pandereta nel panorama ibéricu; y una mayor conciencia de la necesidá de visibilizase y visibilizar a les muyeres nos escenarios. Pero yo como coetánea d’elles, pienso que tampoco se pue escaecer el papel de l’autoestima personal y la seguridá nuna mesma que-y da a una muyer el vese cola metá del camín al llombu y la otra metá per delantre, sabiendo mui bien lo que quier y lo que non.
Asina nació 286 llunes, cifra que marca la cantidá de ciclos nos que la lluna acompañó’l camín d’estes muyeres, y títulu del discu que presentaron el pasáu 22 de marzu en La Benéfica de L’Infiestu. Con el, Herbamora sigue la llinia d’esplorar les posibilidaes vocales sobre’l repertoriu tradicional, pero trayéndolu agora a la electrónica. Equí atrévense amás a dar una vueltina a les lletres (que siguen cola so seña d’identidá d’identificalos llingüísticamente cola zona onde se recoyeron, un llabor que cunta cola ayuda del filólogu Fernando Álvarez Balbuena), p’alloñales de la misoxinia y la idealización del amor románticu que s’atopa munches veces nos temes antiguos.
Foi esti un espectáculu, preparáu con meses d’adelantu, onde se cuidaron al máximu tolos detalles pa crear una esperiencia musical y audiovisual de primer orde qu’emocionara al públicu tanto como a elles mesmes. Con esti fin, les cinco integrantes del grupu decidieron arrodiase d’un garrapiellu-conscientemente mistu y, por ello, con bien de visibilidá pa les muyeres- de profesionales de confianza, demostrando per un llau el compromisu cola cultura del territoriu y per otru’l valor que-y dan al enfotu nos cuidaos y les persones.
«Foi esti un espectáculu, preparáu con meses d’adelantu, onde se cuidaron al máximu tolos detalles pa crear una esperiencia musical y audiovisual de primer orde qu’emocionara al públicu tanto como a elles mesmes»
Una figura clave n’Herbamora, pero mayormente invisible al públicu, ye Ruth Suárez: productora, arreglista, profesora de cantu y, como recordaba Pau nos agradecimientos del conciertu, la que les echa p’arriba «cada vez que les invade’l síndrome de la impostora». Con ella al mandu los cinco instrumentos que son les sos voces sonaron meticulosamente afinaos y harmonizaos.
La escenografía, allumada por Óscar Vega, preparóronla con procuru Carmen Colunga y Elena Rato, engalanándolu colos motivos que son seña d’identidá del grupu: siluetes vexetales y, presidiendo l’escenariu, una pandereta-lluna onde la mesma Carmen proyectaba los acompañamientos audiovisuales del espectáculu, que xugaben con imáxenes de video d’elementos naturales y de vida tradicional. Estes proyecciones algamaron un protagonismu especial nel tema ‘Lluna de sangre’, onde se proyectó la imaxen en movimientu de Concha’i Clara de Tresmonte, coincidiendo col sample de la so voz que s’emplega nel cantar.
La sonorización llevóla Tana, técnicu que yá trabayara con elles na primer etapa d’Herbamora, y nel escenariu les acompañaron Marga Lorences a l’acordión y Julio Rodríguez al bouzouki, amás de Marcos García a la percusión y remanando la parte electrónica.
Pa la imaxe del grupu, vistiéronse toes de negro, con unos traxes d’elegancia minimalista fechos artesanalmente por Moki onde, con tela hermano, caúna escoyó’l diseñu que meyor dicía col so estilu, como muestra del nivel d’atención al detalle y simbolismu de cada decisión tomada nesti asuntu.
P’acabar, yo mesma tuvi’l gustu de collaborar, cumpliendo col encargu d’escribir un testu que dialogare con caún de los cantares del discu nuevu, y que valieren d’introducción nel conciertu. Anque tengo escrita dalguna lletra de cantares, esta foi una esperiencia diferente y pa min mui arriquecedora: afondar nos carreros qu’abren na mente y na sensibilidá les palabres escrites por otres, o por esa poeta perdida nel tiempu que ye l’autora de les lletres tradicionales, qu’a veces trátense como si estes palabres surdieren soles y perdemos la conciencia de que siempre foi un ser humanu real (y munches veces muyer) que les compunxo.
Arrancó’l conciertu a les 19:00 énte una Benéfica atarriquitada de xente onde ye prestoso destacar que les dos o tres primeres fileres taben ocupaes por una reciella abundante (¡qué importante ye programar eventos culturales pensando nel públicu familiar, qu’al final ye semiente de futuru!) . Y, como taba too pensao, tamién se dexó sitiu abondo alantre pa quien s’animare a baillar.
«Ye prestoso destacar que les dos o tres primeres fileres taben ocupaes por una reciella abundante (¡qué importante ye programar eventos culturales pensando nel públicu familiar, qu’al final ye semiente de futuru!)»
El conciertu entamó con ‘Lluna de collecha’, ganadora del Premiu AMAS 2024 a la meyor canción folk, y la qu’abre’l discu; y a lo llargo d’esti fueron alternándose los temes nuevos, los temes del repertoriu anterior como ‘Mermuradora’, ‘Corales na montaña’ o ‘La Muñeira de Trabáu’, acompañaes pola percusión, curdión y bouzouki, más dalgún tema del repertoriu tradicional tocáu a capella ente les cinco herbamores con dalguna revisión propia. Ente estos hai que destacar ‘La Siega de Trabáu’, una de les melodíes más conmovedores del repertoriu que nos dexaron María y Arcides. La interpretación cuntó cola collaboración de Sandra Zamora, la cantautora y poeta tamién conocida como Zarzamora, que recitó un testu propiu bien emocionante sobre la memoria campesina, y axuntó la so voz al cantar, qu’entonaron al son del panderu de Peñaparda, adaptándolu al ritmu del ajechao salmantín y con una lletra preciosa d’Eider Goñi enllena de sensibilidá contemporánea.
Otru de los momentos estelares del eventu foi la ‘Lluna de sangre’, onde como dicía enantes se proyectó’l videu de Concha esplicando’l papel que la música tenía na vida que llevó de neña. Ellí se rindió homenaxe a una de les personalidaes más importantes de la música tradicional, porque munches veces alúdese a estes maestres como “informantes”, como si namás fueren vehículos de tresmisión d’unos temes o técniques que vienen de nun se sabe ónde, como si nun tuvieren atravesaos pola sensibilidá y el talentu propiu de les muyeres que los tocaron; igual que pasa colo que dicía enantes de les lletres. El saber que Concha ye, amás, güela d’Elena añade un estra d’emoción al recordar esa figura que ye un patrimoniu del pueblu asturianu
«Se rindió homenaxe a una de les personalidaes más importantes de la música tradicional, porque munches veces alúdese a estes maestres como “informantes”, como si namás fueren vehículos de tresmisión d’unos temes o técniques que vienen de nun se sabe ónde, como si nun tuvieren atravesaos pola sensibilidá y el talentu propiu de les muyeres que los tocaron»
Acabó’l conciertu, pero non la xuntanza, porque nel cartel taba convocada espicha de traxe, una de les meyores maneres d’asegurar qu’haya comida como pa una boda, y pinchada de la DJ Killaphonia, que punxo a tol mundu a baillar colos sos sones onde se turnaben los temes asturianos colos d’otres músiques de raíz, pero siempre con una impronta de muyer.
Col discu, y con esti directu tan poderosu (que quedo captáu pola la fotógrafa y camarógrafa piloñesa Naysemeya, ¡que se vea pronto’l resultáu!), Herbamora non solo presenta un momentu pal disfrute, sinon que reflexona y fai reflexonar sobre que respetar y honrar la tradición nun ye namás caltenela (cosa que tamién saben facer, per otru llau), sinón averala al presente y enanchala cola creatividá de cada persona. Esti puxu y mimu que punxeron nesti conciertu namás fai albidrar que nun van quedar ahí, y que van facer por volver andar los escenarios. Precisamente yá tán anunciaes pa La Folixa na Primavera de Mieres el viernes 4 d’abril y pa Música en Rede de Xixón el xueves 10 d’abril nel Teatru La Llaboral de Xixón.
Suscríbite a les nuestres novedaes
