L’Asociación Cultural La Madreña lleva cincuenta años enllenando’l conceyu de Llanera y el so pueblu, Posada, de música y baille. Mañana, l’auditoriu de La Plaza La Habana va acoyer un conciertu col que van celebrar el so aniversariu. Amás, hasta’l 11 d’abril va poder esfrutase na Casa la Cultura una esposición que percuerre la so historia nestes décades. Asoleyamos esta entrevista na que falen de los que-yos mueve pa siguir, los meyores momentos y lo que va poder vese enriba l’escenariu nel espectáculu d’esti sábadu.
¿Por qué y cómo surdió l’A.C. La Madreña?
Nun lo tenemos mui claro. Sabemos que l’aniciu foi gracies a Pichi y Bazares, ente otros, qu’entamaron el camín de crear un grupu de baille qu’ensayaba en Villaperi. Dempués pasó a Cayés y d’ehí a Posada. Llueu xuntóse David, el pá y tíu de les nuestres componentes más antigües, p’ayudar, y pasín ente pasu foron medrando y dándose a conocer. De grupu de baille pasamos a sumar la banda gaites y la nuestra firma, A. C. La Madreña.
Formóse como un grupu de persones de Llanera con gana de baillar y recuperar lo nueso, y eso ye lo qu’intentamos caltener mientres esti tiempu. Amás, dimos-y una identidá propia; facemos too eso pero como una gran familia.
«La Madreña formóse como un grupu de persones de Llanera con gana de baillar y recuperar lo nueso, y eso ye lo qu’intentamos caltener»
¿Cuál foi’l proyectu más ilusionante nestos 50 años? ¿Y na última década?
Proyectos tuvimos unos cuantos, pero’l más ilusionante foi volver a surdir dempués de la pandemia, cuando víemos que diba ser difícil tornar. Non namás tornamos, sinon que vieno xente nuevo con muncha gana que nos ficieron ver que nun podíemos arrenunciar y teníemosque volver lluchar, baillar y tocar con más ganes que nunca. Nun podíemos perder esto tan guapo que tenemos.
«El proyectu más ilusionante nestos años foi volver a surdir dempués de la pandemia. Vieno xente nuevo con muncha gana que nos ficieron ver que teníemos que volver baillar y tocar con más ganes que nunca»
En tantos años d’actividá, tendréis anécdotes y momentos especiales abondo, ¿queréis compartir dalgún d’ellos?
Del nuestru primer gran viaxe n’autobús a Alberobello -Italia- va cuasique 30 años; el del primer viaxe n’avión a Tenerife; actuaciones en festivales como l’Intercéltico d’Occidente -Tapia-; o dende’l nuestru queríu Exconxuraos que nos dio tan bonos momentos hasta venos desfilando pela Quinta Avenida. Sicasí, l’anécdota ta nel día a día, nos tres díes de la selmana nos qu’ensayamos, nes actuaciones na nuestra tierra por y pa la nuestra xente. Eso ye lo que más nos llena.
¿Cómo recibió y recibe la xente del conceyu la vuestra iniciativa cultural?
Siempre fuimos bien acoyíos y respetaos. Ye verdá qu’esti tipu d’actuaciones tán perdiéndose nes fiestes de prau, qu’enantes yeres les nuestres grandes fiestes, pero ye normal. Los recortes lleguen agora a tol mundu y, xeneralmente, soluciónense con una gaita y un tambor. Con too, la nuestra xente acompáñanos siempres nes actuaciones nel conceyu y fuera d’él.
Pa celebrar esti 50 aniversariu, la Casa la Cultura de Llanera va acoyer hasta’l 11 d’abril una esposición con cachinos de la vuesa historia, ¿qué va poder vese nella?
Vese una amuesa de la nuestra indumentaria dende l’aniciu, asina como de los nuestros banderines a lo llargo d’estos 50 años. Munches semeyes y detalles de los nuestros grandes momentos y una bona recopilación de noticies de prensa mientres esti tiempu.
Amás, actuáis el 29 de marzu en Posada, ¿qué podéis avanzanos del espectáculu? ¿Va haber collaboraciones?
Va ser la lleche. Nun actuamos namás los 59 componentes d’anguaño, sinón que tamién vienen los que baillaron o tocaron en dalgún momentu, los nuestros directores y profesores de les dos disciplines, y vecinos que collaboraron con nós. Foi ablucante y, al mesmu tiempu, gratificante ver l’acoyida y disponibilidá de la xente. La Madreña siéntese quería nel so pueblu, nel so conceyu, otra vuelta.
«Esti sábadu actúen quien baillaron, tocaron dirixeron o punxeron clase en La Madreña en dalgún momentu, amás de vecinos que collaboraron con nós. Foi ablucante ver l’acoyida y disponibilidá de la xente»
Pa finar, anque’l conceyu Llanera ye’l “corazón d’Asturies” y nél hai actividá económica enforma, paez que nun ye de los que más apueste institucional faen pola música asturiana, anque entamen tolos años el conciertu pol Día de les Lletres Asturianes. ¿Qué valoración facéis d’ello? ¿Qué propuestes-y fadríeis a la Conceyalía de Cultura?
Nel nuestru casu, en 50 años tuvimos que trabayar con ayuntamientos y xestores de tou tipu y color, y tenemos que dicir que nos sentimos siempre sentíos y valoraos. Prueba d’ello ye, una vez más, les posibilidaes que nos dieron pa poder facer esti conciertu del sábadu.
Sí hai dos coses que nos prestaría pidir y que nos serviríen pa toles asociaciones: Llanera necesita un auditoriu con mayor capacidá y un albergue pa poder facer intercambios con una seguridá, ente otres coses. Necesítase un espaciu zarráu que pueda acoyer pelo menos a 400 persones y que pueda agospiar a unes 60 o perhí.
Suscríbite a les nuestres novedaes
