Rodrigo Cuevas asoleya ‘Manual de Romería’
Yá ta a la venta en CD y vinilu y en toles plataformes musicales, Manual de Romería, l’esperáu segundu trabayu de llarga duración del axitador folclóricu, el rei del cortexu, el llabrador d’una Asturies diversa y arguyosa de la so identidá rural, l’animal escénicu. Rodrigo Cuevas presenta 14 cantares enllenos de sensualidá y fuerza, de romería, d’electrónica retro, de folclore que tresciende a les llendes asturianes, de mensaxe disfrutón, costumista y comprometíu a la par; seya n’asturianu, en castellanu, n’amestáu o en francés.
El discu ta grabáu y producíu por Eduardo Cabra “Visitante”, músicu , compositor y productor de la pernomada banda puertoriqueña Calle 13. Y nél, Rodrigo Cuevas fai esi viaxe que tantes xeneraciones d’asturianos fixeron nel pasáu; dende l’Asturies rural hasta Llatinoamérica, faciendo d’enllaz ente les imprescindibles voces de la tradición que suenen nel trabayu –Mariluz Cristóbal Caunedo, Edelio González Fernández, Josefa Diebra Faúndez y Nieves Rodríguez Cañón– y los instrumentos y coros de músicos del otru llau de la mar, ente los que destaca la voz d’iLe -que tamién fuera vocalista de Calle 13- y instrumentos como’l cuatro venezolano, charango, roncoco o tres. Tamién tien el so protagonismu la veterana agrupación coral corsa A Filetta y José González “El Presi”, sampleáu nún de los temes.
Un álbum nel que Rodrigo Cuevas afítase como ún de los artistes cimeros de la so xeneración, tanto dientro como fuera d’Asturies, gracies a un proyectu interdisciplinar articuláu alredor de la música, pero onde lo perfomativo, lo representativo y lo audiovisual tamién son pegollos de la propuesta.
Xira y lyric videu nuevu
Esti asturianu universal continúa’l camín de la internacionalización de la música asturiana qu’abrió a finales del sieglu XIX Ramón García Tuero, El Gaiteru Lliberdón, y la so xira ye una amuesa d’ello. Dempués de llevar tol branu actuando per festivales y teatros, agora mesmo tien anunciaes más de 20 feches; distintos llugares de Méxicu, Portugal, Catalunya, Francia o Galicia van acoyer el directu de Rodrigo Cuevas xunto a los sos destacaos compañeros d’escenariu: Mapi Quintana (percusión y coros), Rubén Bada (guitarra, percusión y coros), Juanjo Díaz (percusiones) y Tino Cuesta (sintes, programación y coros). Los próximos conciertos n’Asturies -22 y 23 d’avientu en Xixón- tienen les entraes escosaes.
P’acompañar al llanzamientu d’esti discu publicáu por Sony Music, l’uvieín afincáu en Piloña asoleya’l lyric videu de “Allá Arribita“, un cantar que dende la discográfica presenten como «otru claru exemplu de la virtú d’un Rodrigo Cuevas que crea una pieza única de folclore contemporáneu que podría tar escrita dende va sieglos, pero que nació na voz d’un artista escepcional en 2022». El single aporta dempués de los adelantos audiovisuales “Cómo ye?!”, “Más animal” y “Casares“, tien un visual obra de Marine Hercouët y representa l’espíritu d’esti cuidadísimu trabayu,
