El multiinstrumentista Rubén Bada sigue dando novedaes rellacionaes col so primer álbum en solitario qu’asoleyó’l setiembre pasáu. El reputáu músicu ta acabante d’estrenar en YouTube’l videu de ‘El Veleta‘, dempués de qu’hai un par de selmanes llanzara’l de ‘Angelín nos Ozcos (Muliñeira)‘. Estes pieces trátense d’una serie d’interpretaciones en vivo de temes del so trabayu últimu y tán realizaes por Javi Lueje y Rubén Arena.
«Angelín yera un gaiteiru de la zona d’Ozcos qu’emigrara a trabayar pa les mines de Cangas. Por eso la muliñeira que tocaba suel conocese como ‘muñeira de Rengos’. La segunda pieza deprendíla del vigulín de Guzmán Marqués y Elías García«, desplicó Bada pa contestualizar la primer de les obres audiovisuales qu’acompañen a temes del so discu. Pa la segunda escoyó un tema vocal, ‘El Veleta’, que define como «un cantar de chigre perpopular nel centru d’Asturies».
El guitarrista continúa amás esti fin de selmana la so xira que yá lu llevó per Grau, Xixón, Uviéu, Teberga y el prestixosu festival Celtic Connections de Glasgow. El sábadu a les 20h actúa n’El Manglar d’Uviéu dientro del ciclu Sesiones Delicuescentes con un preciu d’entrada de 12 €.
Rubén Bada ye’l discu homónimu nuevu d’esti perconocíu músicu’l país. L’artista llanzó un «trípticu» que tien trés estayes –‘Guitarra‘, ‘Vigulín’ y ‘Cantares‘- na que caúna fai referencia a trés óptiques dende les que Bada mira’l folk y la música tradicional. En ‘Guitarra’ hai seis cortes con pieces interpretaes en xéneru instrumental col so instrumentu principal, emplegando’l so estilu de fingerpicking col que yá venía trabayando n’otros tantos proyectos. ‘Vigulín’ son cuatro cortes nos qu’ufierta pieces mui lligaes a la tradición del baille: xotes, muñeires, agarraos, etc., dalgunes tradicionales, otres de composición propia. ‘Cantares’ ye la parte dedicada a les coples y les melodíes tradicionales y populares, de chigre, pal baille, de tonada… Les igües d’estos temes son ocho ayalgues qu’amuesen quiciabes la visión más personal del músicu sobre estos repertorios.
Rubén Bada ye ún de los músicos de folk asturianos con mayor proyección internacional. Vigulineru, guitarrista y conocíu sobre manera por tocar el bouzouki, collaboró con grupos como Corquiéu, N’Arba, Dixebra… Foi miembru de DRD, Xéliba, L-R, amás de continuar col grupu Calea, y collaborar con una montonera grupos y agrupaciones na escena asturiana, ente los que se cunta Rodrigo Cuevas.
Suscríbite a les nuestres novedaes
