Güei ye San Xuan y con esta fiesta aporten los enrames de les fontes, dances primes, les fogueres y una montonera d’actuaciones de música asturiana que van repartise per dellos puntos d’Asturies. Avilés, Corvera, Grau, Llaviana, Mieres, Nava, Ribeseya, Uviéu y Xixón concentren les programaciones onde más presencia va haber de los formaciones venceyaes a la música n’asturianu y a la cultura tradicional.
N’Avilés la Plaza Pedro Menéndez acueye unes actividaes qu’arranquen a les 20h con un taller de danza impartido pol colectivu Amigos de la Danza Prima. A les 22.30h actúa Ajo Band -formación de música tradicional qu’hai un añu asoleyó’l discu PUXA- nel Quioscu del Parque del Muelle y a les 23.30h l’agrupación Escontra’l Raigañu.
La foguera de Corvera, declarada Fiesta d’Interés Turísticu, celébrase nel Embalse de Tresona. El programa de música asturiana arranca a les 22h con una actuación de la Banda Gaites de Corvera pel área festiva que va dar pasu, yá a les 22:15, a un conciertu del xoven grupu de folk celta Guieldu y la formación de música tradicional Caparines.
En Grau van enramase les fontes de la Casa de Cultura y de la Plaza Álvaro González y facese darréu una danza prima a les 19h y 19.30h respectivamente. A les 22.30h actúa la bandina tradicional Conceyu Grau y a les 23h nel Parque de Arriba hai un taller de baille y música’l país al cargu de Nel Villanueva.
La Pola Llaviana festexa San Xuan a ritmu de rock astur. Dende les 20.30h el Quioscu Platillo de l’Avenida na Plaza Ayuntamientos Democráticos va acoyer los conciertos de Dixebra, el grupu decanu del rock astur y ún de los imprescindibles d’una nueche de San Xuan, y de Raigañu, banda d’agro-folk-rock que nació esti añu y que ta nesti momentu faciendo la xira presentación del so discu nuevu.
En Mieres hai enrame y desfiles a les 19h de les agrupaciones tradicionales del conceyu L’Artusu (Paséu Escación El Vascu), Prau Llerón (La Villa) y Ruxidera (Fonte Ayuntamientu). Nava tamién apuesta otru añu más pola música asturiana y nesti San Xuan toquen De Cotía a les 23.15h na Plaza Manuel Uría; mientres qu’en Ribeseya la bandina Los Muíles va actuar a les 20h.
N’Uviéu actúen les agrupaciones folclóriques Trasgu, Banda Gaites Vetusta y a Media Legua pel Antiguu y la Zona Comercial de 18.30h a 22.30h y el Coru de Muyeres San Esteban va facer un pascáis enramando les fontes dende les 19h saliendo dende la fonte del Caracol (campu San Francisco) y pasando pela fonte de La Escandalera y la de la Catedral.
En Xixón, doce grupos de baille del conceyu van enramar les fontes de 18h a 20.30h. Son la Escuela de Música Tradicional Trubiecu (Llavaderu Deva, 18h), Grupu Folclóricu La Alegría (Fonte Nueva de Porceyo, 19h), Coros y Danzas del Grupo Covadonga (Plaza de la Guía, 19.30 h), Grupu Folclóricu El Turruxón (Fonte Fon Fría, Trubia, 19.30 h), Andecha de Cultura Tradicional Na Señardá (Fonte Pelayo, Plaza’l Marqués, 19.30 h), Grupu Folclóricu El Xolgoriu (Llavaderu de Llorio, 20.00 h), Música y Baile Tradicional Excelsior (Fonte y Llavaderu L’Arrionda, Llantones, 20.00 h), Coros y Danzas Flor de Xaranzaina (Plaza Clara Ferrer, 20.00 h), Asociación de Coros y Danzas Jovellanos (Fonte de Los Campinos, 20.00 h), Agrupación Folclórica Asturiana Los Xustos (Parque Zarracina, 20.00 h), Grupu Folclóricu Xiringüelu (Fonte y Llavaderu del Trole, 20.00 h) y Grupu Folclóricu Marabayu (Fonte La Fontica, Cimavilla, 20.30 h).
Enantes del encendíu de la Foguera de San Xuan, na sablera de Poniente, van tocar siete bandes de gaites. Les actuaciones entamen a les 18.00h cola Banda de Gaites Garuya, siguiéndo-y la Banda de Gaites Conceyu de Xixón (18.45 h), Banda de Gaites La Magüeta (19.30h), Banda de Gaites Villa de Jovellanos (20.15 h), Banda de Gaites Saxum (21.00 h), Banda de Gaites Villa de Xixón (22.15 h) y, finalmente, Banda de Gaites Noega (23.00 h).
Suscríbite a les nuestres novedaes
