Silvia Quesada y José Manuel Tejedor participen esti xueves nel Celtic Connections, en Glasgow

La cantante Silvia Quesada y el gaiteru José Manuel Tejedor van representar a Asturies nel festival Celtic Connections, una de les cites más importantes del añu pa la música del Arcu Atlánticu. Los dos van participar esti xueves nel espectáculu Celtic Odyssée, que yá s’estrenara nel Festival de Lorient —trátase d’una coproducción ente los dos certámenes, col apoyu del Gobiernu d’Irlanda— y que va xubir al escenariu a más d’una ventena de músicos de les ocho naciones celtes. La cita ye esti xueves, a les 19:30 hores, nel Glasgow Royal Concert Hall.

Va ser la primer vez que Silvia Quesada participe nesti certame y la cantante, que va compartir l’escenariu con dellos de los nomes más destacaos de la música celta, como Karan Casey o Nial Vallely, esplica: «Vese enriba l’escenariu arrodiada de tanta xente a la qu’almiro y desendolcando un papel d’iguales supón una gran responsabilidá a la par qu’una satisfacción personal grande». Nesi sentíu, destaca la «oportunidá musical» que supón tar nesi escenariu, más cuando ella lleva tiempu centrada na so carrera en solitario y taba «un poquitín desconectada del mundu del folk». «Eso pue abrir otres puertes fuera d’Asturies que yá vía pesllaes», reconoz.

Per otru llau, José Manuel Tejedor yá participó más veces nel Celtic Connections. Con too, indica que volver pa Glasgow supón «un escaparate grande» por ser un festival onde se van dar cita los programadores de los festivales más importantes del Arcu Atlánticu y califica de «arguyu» participar nesti Celtic Odyssée representando a Asturies. Amás, destaca la importancia que tienen cites como esta pa la música asturiana, polo que reclama a les alministraciones públiques un «esfuerciu» pa salir fuera de les nuestres fronteres. «Deberíemos contar con más ayudes empobinaes precisamente a estos viaxes y xires nel estranxeru», reclama.

«Nun podemos escaecer lo qu’esto significa pa la música asturiana y n’asturianu, que va a tar presente nun de los festivales más importantes de folk d’Europa colos soníos y les voces de los músicos más destacaos del arcu atlánticu»

Silvia Quesada diz que dientro d’Asturies ye evidente qu’hai un interés mayor pola nuestra música y qu’hai dellos nomes que tamién tán sonando fuera, «lo que xenera más interés na xente». Sicasí, recuerda que tovía queda “munchu camín por andar”. Un camín, recuerda, onde van tener que s’implicar músicos y programadores. «Paez qu’hai intención dende la Conseyería de Cultura, con iniciatives como Asturies Cultura en Rede, pero nun creo que tean favoreciendo a la creación y promoción de la nuestra música», sentencia.

Merca discos de Silvia Quesada y Jose Manuel Tejedor na tienda online

Dexa un comentariu

X