El vienres 20 de marzu la sala Kuivi Almacenes d’Uviéu va acoyer la folixa 20 años de Skama la Rede na que’l grupu va celebrar les más de dos décades que lleva de trayectoria y presentar el so últimu trabayu discográficu. Pa ello, la banda asturiana de ska-punk decidió entamar un conciertu especial que va durar dos hores y nel que van participar una quincena de músicos d’otres formaciones, tanto de dientro como de fuera d’Asturies.
A falta de concretar dalgún convidáu más que ta nel aire por cuestiones d’axenda, el Skama la Rede anunció que van collaborar cantantes asturianos como Xune Elipe (Dixebra), Daviz Rodríguez (Mala Reputación), Raquel (Ochobre), Pirri (Escuela de Odio), Humber (Misiva) y Delfo (La Tarrancha). Igualmente, el grupu tiene confirmaos a los músicos Xuan Rodríguez (Llan de Cubel y Matazúa), Natalia Menéndez (Ochobre), Daniel Álvarez (Corquiéu) y la gaitera candasina Aida Sánchez.
Tamién van apaecer pel escenariu carbayón dos nomes bien conocíos de la escena estatal como son Juankar Cabano (voz y baxu de los madrilanos Boikot) y Gabri Reigosa (voz y guitarra de los gallegos Dakidarría). Amás, enantes y dempués del conciertu, el DJ Avante’l Pueblu va facer un esbilla musical con temes ska, punk, rock, rap y d’otres músiques alternatives y con discursu reivindicativu.
El ritmu de venta de les entraes ye bien altu y va camín de les 350 llocalidaes vendíes pa una sala que tien un aforu de 500 persones. La venta antemanada ta disponible na web del Kuivi al preciu de 8’80 euros y, nel casu de nun esgotase, van poder alquirise’l día de la Folixa na puerta a 10 euros.
Esti conciertu -que va grabase en videu y audio cola intención d’asoleyar dalgunes partes nos próximos meses ye la continuación de los actos de celebración de les más de dos décades que’l grupu lluanco-candasín-maliayu lleva enriba les escenarios. Un cumpleaños que tuvo como fechu principal la publicación de 20 Años, un vinilu qu’inclúi ocho cantares y que vien acompañáu d’un llibru que resume la historia de la banda a traviés de testos d’escritores, periodistes, músicos y activistes culturales.
Suscríbite a les nuestres novedaes
