N’abril del pasáu añu presentábase Tasio, un proyectu musical nuevu qu’entemez música asturiana y electrónica formáu pol músicu Dudu García. Tres de llanzar daquella los singles ‘Tener praos‘ y ‘Texedora‘, l’artista ta acabante d’estrenar el so nuevu videoclip, ‘La seca’, un adelantu del que va ser el so primer discu Clá 83.
«‘La seca’ fala d’una Asturies desértica nel 2035 como consecuencia de la falta d’agua«, desplica Tasio, que pa ello fai una lletra «a camín ente la chancia y l’alarma«. Musicalmente tien ritmu popular amestáu con una base electrónica y ta arriquecíu cola incorporación d’una guitarra eléctrica tocada pol músicu y productor Zeros. El videoclip ta fechu por Javi Lueje y grabóse nuna cantera vieya.
Esti cantar ye l’adelantu de Clá 83, el primer LP que Tasio va asoleyar a primeros de 2026. Nél va poder sentise «un estilu propiu nel que se reconocen los raigaños y nel que nun hai barreres d’estilu o forma», como desplica Dudu García, músicu que lleva cuasi dos décades rabilando pente la música tradicional y la electrónica y que con esti proyectu axunta estes dos estayes.
Suscríbite a les nuestres novedaes
