A primeros d’esti mes la Banda Gaites Llacín interpretó nel Teatru La Llaboral de Xixón l’espectáculu del so discu nuevu, Resollu, dientro de la programación de les Xornaes de la Música Tradicional. Esti conciertu especial nel que participaron una montonera de músicos y bailladores va emitise esti xueves 1 de xineru a les doce‘l mediudía como conciertu d’añu nuevu de TPA.
Resollu ye un discu ta formáu por doce temes que, en pallabres del codirector de la banda, Vítor Carbajal, ponen «un pie na tradición y otru na modernidá, busquen un soníu más potente de la banda y añaden propuestes sonores nueves que ruempen con tolo anterior». A lo llargo de 53 minutos esti trabayu axunta dellos estilos y cunta coles collaboraciones de destacaos nomes de la música asturiana que formen parte d’agrupaciones como Llan de Cubel, Felpeyu, Corquiéu o Tuenda, ente munches otres: Lisardo Prieto (vigulín), Luis Nicolás (guitarra), Moisés Suárez (guitarra y bouzuki), Julio Rodríguez (bouzuki), Dani Álvarez (flauta travesa y bodhran), Pepín de Muñalén (flauta travesera), Miguel Herrero (viento metales), Israel Sánchez (batería), Sam Rodríguez (piano), Sergio Rodríguez (baxu y programaciones) y Xosé Antón Ambás (voz).
Dellos d’estos músicos -xunto a otres artistes y formaciones, como Lluci Palomares o el Grupu Etnográficu l’Oriente– participen tamién del espectáculu en directo que s’entrenó’l 4 de xunetu en Llanes axuntando a cuasi 100 persones enriba l’escenariu. Un conciertu mui destacáu que s’interpretó yá delles vegaes en vivo y del qu’esti xueves va poder vese na TPA la so puesta n’escena más recién.
Suscríbite a les nuestres novedaes
