El documental “N’Asturies la gaita siempre ta”, emitíu pola TPA la selmana pasada, reivindica la importancia d’esti instrumentu tradicional al traviés d’un percorríu pela so hestoria, evolución y situación actual n’Asturies.
La producción cuenta con testimonios de figures destacaes del mundu de la gaita, como los gaiteros Xuacu Amieva y Hevia, dos referentes fundamentales na música tradicional y contemporánea asturiana, mesmo qu’otra xente que foi pionero nesti mundu, como Keti García Fernández, qu’entró dende neña nesti espaciu tradicionalmente masculín. La so participación aporta una visión esperta sobre la evolución del instrumentu y la so proyección internacional.
A lo llargo del documental tamién apaecen otros perfiles venceyaos a esti ámbitu, como Flavio Rodríguez Benito, David Varela o Lisardo Lombardía amosando la importancia del procesu d’enseñanza y del instrumentu en xeneral, asina como de la so fabricación, con persones como Berto Varillas, Vicente Prado «El Pravianu» o Iván Fernández. Esti enfoque permite entender la gaita non solo como elementu musical, sinón como parte esencial del patrimoniu cultural asturianu.
Amás, inclúyense actuaciones musicales y pieces grabaes en escenarios como la Laboral Ciudá de la Cultura, onde la gaita comparte protagonismu con otros estilos, demostrando la so capacidá d’adaptación y evolución. D’esta manera, el documental presenta una visión completa d’un instrumentu que pasó de tar venceyáu a la tradición popular a convertise nun símbolu modernu y internacional d’Asturies, gracies al trabayu de músicos como Amieva o Hevia y de les nueves xeneraciones que siguen calteniéndolu vivu.
El documental puede vese agora en RTPA a la Carta.
Suscríbite a les nuestres novedaes
