Última selmana p’apuntase a Dinamiz-ARTj, el programa que puxa pola música en directo nes zones afectaes pola «transición xusta»
Hasta’l 15 de payares ta abiertu’l plazu pa inscribise en Dinamiz-ARTj, un programa incluyíu na Red Cultural del Instituto para la Transición Justa (ITJ) que tien l’enfotu de xenerar una ufierta cultural amplia nos conceyos asitiaos nes zones afectaes pola llamada «transición xusta». Los artistes inscritos van poder entrar nun circuitu cultural d’ámbitu estatal pa dar conciertos y asina recibir una remuneración de 400 € por persona, con un máximu de 2.000 € por grupu y actuación.
Los requisitos pa participar son qu’un de los componentes tenga menos de 36 años, que’l proyectu lleve polo menos un añu n’activo, y cumplir dalguna d’estes otres tres condiciones: tener una titulación superior oficial -o equivalente nun centru priváu de reconocíu prestixou- rellacionada cola música; algamar un premiu o nominación en concursos, certámenes o programas artísticos d’ámbitu autonómicu, estatal o internacional; ser natural o residente de dalgún de los conceyos de les zones de transición xusta; y tener dao polo menos diez conciertos nos últimos cinco años.
Tola información ta disponible nesti videu o na web de Dinamiz-ARTj, espaciu onde los artistes y ayuntamientos interesaos en participar tienen que presentar les solicitudes online pa poder apuntase nesti programa xestionáu pola Fundación Ciudad de la Energía (CIUDEN). Con esta novedosa iniciativa el Ministeriu pa la Transición Ecolóxica y el Retu Demográficu quier xenerar actividá a traviés d’un elementu dinamizador como ye la cultura: complementar la ufierta turística nos conceyos onde van desendolcase les actuaciones y favorecer l’intercambiu social con accesu gratuitu a les actividaes culturales.
27 conceyos d’Asturies
Dende Dinamiz-ARTj tamién apurren una llista colos distintos conceyos del Estáu español consideraos de «transición xusta». N’Asturies son un total de veintisiete conceyos. Seis nel suroccidente -Allande, Cangas, Degaña, Ibias, Salas, Tinéu-; catorce nel Valle del Caudal y Aboño -Ayer, Carreño, Corvera, Xixón, Gozón, Llanera, Mieres, Morcín, Quirós, La Ribera, Riosa, Teberga y Villaviciosa-; y siete nel Valle del Nalón -Bimenes, Casu, Llangréu, Llaviana, Piloña, Samartín del Rei Aurelio y Sobrescobiu-.
