Dempués de los exemplos recientes de les fiestes de Baíña y de les d’El Pote, súmase una fiesta popular más qu’apuesta pola música asturiana na so programación. Trátase de los festexos de Barros, en Llangréu, que se celebren dende’l 29 d’agostu al 1 de setiembre. La so programación va acoyer, ente otres actividaes, una actuación de L’Enguedeyu, el VII Alcuentru de Bandes de Gaites n’Alcordanza de Paco, el VI Concursu de Baille a Lo Suelto y un conciertu del gaiteru Daniel Meré.
El Colectivu de Baille y Música Tradicional L’Enguedeyu va actuar el vienres 29 a les 19h p’acompañar al pregón de les fiestes. El sábadu 30, la comisión de fiestes y la Banda Gaites Conceyu Llangréu entamen el VII Alcuentru de Bandes de Gaites n’Alcordanza de Paco nel que van actuar la Banda Gaites Conceyu Xixón, la bandina popular Los Gascones, el tríu mozu de música tradicional Rellume y la mentada BG de Llangréu. Primero van facer un pasucáis a les 17h y llueu tocar na carpa a les 19h.
El domingu 1 a les 11.45h ye la sesta edición del VI Concursu de Baille a lo Suelto Pozaricando-Memorial Cinthia Liébana. Nel pueden inscribise hasta’l 31 d’agostu a les 15h a traviés del corréu bgconceyullangreu@gmail.com profesionales y aficionaos. Quien participe ha baillar trés pieces obligatories: lo pesao, lo llixero y la muñeira -nes sos variantes de la zona centro-sur-, el primer premiu ye de 300 € y el segundu de 200 € na estaya profesional y d’un diploma na d’aficionaos.
La programación de música’l país zárrase’l cola actuación del gaiteru Daniel Meré. El bañugueru, director de la Banda Gaites Cabu Peñes, perconocíu polos sos videos en TikTok y les collaboraciones xunto a artistes mozos de renome como’l raperu Enol, va ufrir el so repertoriu a les 13.30h del domingu 1.
Suscríbite a les nuestres novedaes
