Esti vienres 2 de mayu inaugúrase con un conciertu de la OSPA la 46 Selmana de les Lletres Asturianes, cita entamada pola Conseyería de Cultura, Política Llingüística y Deporte qu’esti añu ta dedicada a Xosé Álvarez, Pin (1948-2001), figura clave na primer promoción del Surdimientu y ún de los máximos exponentes de la lliteratura asturiana de la diáspora. Amás de nos actos organizaos pol gobiernu asturianu -qu’inclúi un conciertu de Rafa Lorenzo n’homenaxe a Pin-, la música va tar presente nel Conciertu de Les Lletres de Llanera, nel recital Versovera de Corvera y nel actu de l’Academia de la Llingua Asturiana.
L’Auditoriu Príncipe Felipe d’Uviéu acueye güei a les 20h el conciertu de la Orquesta Sinfónica del Principáu d’Asturies (OSPA) nel que van interpretar les pieces ‘El sombrero de tres picos. Suite n.u 1’, ‘Carmen. Suite n.u 1’, ‘La pícara molinera’, ‘Capriccio espagnol’ y ‘Escenas asturianas’. La entrada ye llibre, anque hai qu’acutala na web de la OSPA. Amás d’esta actuación, la música va tar presente nel conciertu homenaxe a Xosé Álvarez, Pin, al cargu de Rafa Lorenzo, el llunes 5 a les 19.30h nel Centru Sociocultural de Balmonte. Dientro de la programación del gobiernu asturianu va haber tamién actos institucionales, esposiciones, audiovisual, entrega de premios, presentaciones d’obres lliteraries, alderiques y un espectáculu de danza.
Dellos conceyos del país tamién festexen la selmana grande de les lletres asturianes con otres actividaes. Los sones d’Asturies van tar presente en dos d’ellos: el Conciertu de Les Lletres de Llanera y Versovera. El Parque Cuno Corquera de Posada acueye esti sábadu 3 dende les 19h les actuaciones de La Madreña, Fonte Fuécara y Corquiéu que dan forma al eventu que l’Ayuntamientu de Llanera entama dende hai unos años pa esta fecha. Per otru llau, la Rede de Normalización Llingüística nos Conceyos programa’l miércoles 7 de mayu a les 18h en La Llechera de Cancienes el recital Versovera, nel que va tocar el grupu hiphop Mostru l’Horru.
La programación musical d’esta selmana de les lletres complétase cola actuación de la cantadora Lorena Corripio y el gaiteru Vicente Prado El Pravianu dientro del actu del Día de les Lletres que l’Academia de la Llingua Asturiana entama’l vienres 9 de mayu a les 19h nel Teatru Campoamor d’Uviéu. Amás, anque tovía nun hai nenguna confirmación oficial per parte de la Xunta Pola Defensa de la Llingua Asturiana, la manifestación pola oficialidá que tolos años percuerre Uviéu -y qu’esti añu ye’l sábadu 10 de mayu- suel rematar con dalguna actuación musical.
L’homenaxáu nesta 46 Selmana de les Lletres Asturianes, Pin, mantuvo viva la cultura asturiana dende Arxentina, pa onde emigró bien mozu, y más tarde dende Madrid, onde siguió nutriendo la lliteratura infantil en llingua asturiana y vinculóse a asociaciones mui actives na defensa de les llingües y cultura d’Asturies. El llibru Xosé Álvarez, Pin. Asturies siempre y el documental Xosé Álvarez y el Conceyu d’Asturies en Madrid, editaos pol Gobiernu asturianu pa la ocasión, analicen con detalle la trayectoria d’un autor que s’adelantó cuasi nuna década al Surdimientu, escribiendo’l so primer cuentu n’asturianu en 1966, con 18 años. MUSICASTURIANA.COM súmase a les llibreríes y tiendes que van regalar el vienres 9, Día de les Lletres Asturianes, el llibru conmemorativu del autor.
Suscríbite a les nuestres novedaes
